DILI, (TATOLI) – Ministériu Saúde (MS) ho Programa Ai-han Mundiál Nasoen Unida (WFP-sigla inglés) kontinua hala’o simpósiu kona-ba Komunikasaun Mudansa Hahalok no Sosiál (SBCC) hodi suporta komunidade atu halakon má nutrisaun iha Timor-Leste.
“Problema má nutrisaun tenke fó atensaun maka’as, tenke fó edukasaun no halo promosaunn saúde ba komunidade, oinsá komunidade bele konsumu ai-han lokál ne’ebé kualidade no nutritivu ba sira nia família”, Diretór Nasionál Saúde Públiku MS, Pedro Canisio, ba jornalista sira iha salaun enkontru MS, Kaikoli, ohin.
Tuir dadus 2009, demografia hatudu Timor-Leste kuaze porsentu 52 ho má nutirsaun, nune’e iha 2006 má nutrisaun tun ba porsentu 46, ida ne’e hatudu katak ita halo duni intervensaun. Tanba ne’e ema hotu tenke fó kontribuisaun atu kombate.
Estatutu nutrisaun hosi labarik, adolesente sira no mós inan isin-rua no inan fó-susu kontinua sai nafatin dezafiu no mós prioridade hosi asaun hothotu. Tanba ne’e SBCC nu’udar meiu ida hodi fó kbiit ba komunidade nia koñesimentu ba nutrisaun, nune’e komunidade bele iha mudansa hodi toma atensaun ba sira nia-án no mós bele kontribui ba saúde no nutrisaun família, no mos iha ambiente ne’ebé sira hela ba.
SBCC hanesan estratéjia ida bazea ba evidénsia ho objetivu atu hadi’a saúde no nutrisaun. Inklui aprosimasaun sira ba komunikasaun, atividade no mós maneira uza hodi pozitivamente influénsia hahalok.
Hadi’a nutrisaun sempre presiza mudansa hahalok no SBCC karik bele ajuda adaptasaun hahalok agora, hanesan ezemplu husu ema ruma atu konsume ai-han ne’ebé diversu liu ka promove hahalok foun hanesan konsume ai-han fortifikadu hodi hasae númeru konsumu mikronutriente.
Eventu ne’e nu’udar plataforma governu Timor-Leste atu lidera koordenasaun no fahe evidénsia entre parseiru sira ne’ebé servisu iha area nutrisaun no saúde, liliu kona-ba mudansa hahalok ka SBCC.
Ida ne’e nu’udar oportunidade mós ba peritu sira atu fahe sira nia servisu, prátika di’ak liu no aprosimasaun inovativu hodi hadia nutrisaun iha nasaun ne’e.
Iha fatin hanesan, reprejentante no Diretór WFP iha Timor-Leste, Dageng Liu, hateten labarik ida hosi nain rua ho idade tinan lima mai kraik hetan raes badak ka badak hosi nia idade no la hetan nutrisaun ne’ebé adekuadu ne’ebé sira presiza sira nia kresimentu sai adultu.
“Komunikasaun mudansa hahalok no sosiál (SBCC) sai nu’udar dalan efetivu ida hodi prevene má nutrisaun liuhosi hamosu hahalok pozitivu atu hadi’a saúde no nutrisaun. Prevensaun má nutrisaun liuhosi (SBCC) bele ajuda halakon siklu má nutrisaun jerasionál”, dehan.
WFP suporta Ministériu Saúde hodi promove hahalok pozitivu kona-ba nutrisaun, saúde, sanitasaun no mós prátika kuidadu sai nu’udar baze programa sira hodi prevene no halao tratamentu ba má nutrisaun ba grupu vulneravél sira iha Timor-Leste, hanesan labarik tinan lima mai kraik, ina isin rua no inan fó susu no mós adolesente sira, no sosiedade en jerál.
Entretantu, Diretór KOICA, Sikhyon Kim, hateten simpósiu ne’e reprezenta ezemplu di’ak hosi governu no parseiru sira hodi hamutuk komplementa malu no aprosimasaun kolaborativu atu halo mudansa ba estadu nutrisaun ba komunidade Timor-Leste.
Kim akresenta KOICA orgullu hodi suporta eventu ne’e, ba oin presiza tan parseria hodi haforsa esforsu governu oinsa atu hare’e kona-ba asuntu má nutrisaun no problema saúde iha Timor-Leste.
Eventu ne’e hetan suporta importante hosi KOICA, WFP no Ministériu Saúde liu hosi parseria hamutuk ho UNICEF, UNFPA, TOMAK, Ba Futuru, Fundasaun Alola, Catalpa Internasional, Marie Stopes International, John Snow Inc, foka liu ba oinsá bele haree kona-ba labarik, inan isin rua no inan fó susu no mós adolesente sira oinsá sira bele hetan nutrisaun no saúde di’ak liu.
Jornalista: Zezito Silva
Editora: Rita Almeida
