iklan

NASIONÁL, DEFEZA, DILI, MUNISÍPIU, SEGURANSA

PNTL-F-FDTL Kontinua Asegura Estabilidade Iha Loron Boot

PNTL-F-FDTL Kontinua Asegura Estabilidade Iha Loron Boot

Xefe Estadu Maior F-FDTL, Majór Jenerál Lere Anan Timur, ho Komisáriu PNTL no estrutura defesa no seguransa hamutuk deklara ba públiku sei asegura estabilidade durante natal no tinan foun. Imajen Egas Cristovão

DILI, (TATOLI) – Komandu hosi Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) liuhosi konferénsia imprensa hamutuk ohin promete sei asegura estabilidade ba povu durante selebrasaun loron natal no tinan foun 2019.

Operasaun konjunta ho naran sentru komandu kontrolu no operasaun eventuál bazea ba diretiva Ministru Defeza no Ministru Interiór Interino, Filomeno Paixão, ne’ebé sei hahú iha loron 15 dezembru 2018 to’o 15 janeiru tinan oin.

“Iha operasaun natal no tinan foun ami sei la tolera aktu krime ne’ebé mosu no koko atu kria instabilidade hodi destroi ambiente pás durante loron importante rua ne’ebé povu sei selebra”, hateten Komisáriu PNTL, Júlio da Costa Hornay, iha Kuartél Jerál PNTL Kaikoli, ohin.

Durante operasaun konjunta, forsa rua sei halo patrullamentu iha fatin risku konflitu, tantu iha kapitál no munisípiu, kontrola loja ne’ebé faan fugetis no sidadaun ne’ebé tiru paixon, pasa revista ba transporte públiku, liuliu kondisaun viatura, tula pasajeiru tenke tuir regra, hamenus velosidade no seluk tan.

Bainhira la kumpre, komisaríu akresenta sei la tolera ba sidadaun ne’ebé viola regra no regulamentu hodi hatan tuir lei ne’bé vigora.

“Ami forsa rua husu ba timoroan hotu, liuliu joven sira mai ita hamutuk estabelese pás no estabilidade iha ita nia rai, liuliu iha loron importante rua, natal no tinan foun”, apela Komisáriu PNTL.

Nune’e mós, Xefe Estadu Maior F-FDTL, Majór Jenerál Lere Anan Timur, husu ba grupu arte marsiál atu labele terenu no movimentu iha fatin públiku, tanba atividade ne’e liuhosi dekretu Governu taka ona iha 2011.

“Komando rua apela ba timoroan hotu atu hadomi o nia rai, hadomi o nia povu no hadomi estabilidade, tanba estabilidade laiha, dezenvolimentu la la’o”, apela Xefe Estadu Maiór F-FDTL.

Ba lideransa nasaun sira, Lere husu koloka án nu’udar lideransa ba povu tomak, tanba dezenvolvimentu nasaun no povu sei depende iha lider sira.

Jornalista: Agapito dos Santos

Editora: Rita Almeida

iklan
iklan

Leave a Reply

iklan
error: Content is protected !!