DILI, (TATOLI)-Universidade Orientál Timor Lorosa’e (UNITAL), Fakuldade Siénsia Sosiál no Polítika (CISPOL-sigla portugés) kompostu husi judisiáriu Departamentu Adminitrasaun Públika (AP) na’in 16, Relasaun Internasionál (RI) na’in neen, Polítika Dezenvolvimentu (PD) na’in rua, hamutuk 34, realiza judísiu molok gradua husi universidade ne’e.
Atividade judísiu ne’e nu’udar judísiu ba dala lima, etapa rua, iha Fakuldade CISPOL.
Dekanu CISPOL, Isac Viegas Amaral, hateten perante judisiáriu na’in 34 inklui família no parente sira katak loron ne’e nu’udar loron espesiál basá durante tinan naruk, judisiáriu husik hela família tomak tanba atu buka realiza mehi ne’ebé mak iha esperansa boot.
“Mehi ne’e mak lee tiha ona katak apelidu ne’ebé apa, ama tau, agora imi tau tan; lisensiatura Administrasaun Públika, Relasaun Internasional ho Polítika Dezenvolvimentu. Maibé, labele arogánsia, foti aan ho títulu ne’ebé fakuldade, universidade fó. Bainhira nakonu ho siénsia, ita tenke haraik aan iha komunidade,” dehan Dekanu Isac Viegas Amaral, iha Salaun UNITAL, Avenida Becora-Díli, ohin.
“Liafuan ida dehan eu venho para servir, não é ser servido. Ha’u mai atu serbi, la’ós imi atu serbi ha’u. Ida ne’e mak tenke tau iha imi-nia hanoin,” reforsa akadémiku universidade privada ne’e.
Nia mós fó mensajen ba judisiáriu sira nomós inan-aman sira katak atu habelar informasaun ba iha komunidade. “Mai hamutuk, ita hamutuk halo kooperasaun para dezenvolve UNITAL. Ba judisiáriu sira, labele haluha imi-nia almamater UNITAL,” sujere Dekanu Isac Viegas Amaral.
Iha fatin hanesan, reprezentante judisiáriu sira, José Fátima Xavier, iha nia intervensaun, hato’o agredese wa’in ba magnífiku reitór UNITAL, dekanu Fakuldade CISPOL, vise-dekanu no korpu dosente sira tanba konsidera katak durante tinan barak apoiu no motivasaun ba sira.
“Buat balun ami konsege aprende, buat balun la konsege. Ne’e mak hanesan frakeza ami estudante nian I ami nu’udar estudante, hahalok balun ne’ebé karik kondena ita-boot sira, liafuan balun naksalak karik, ha’u reprezenta kolega judisiáriu liliu Fakuldade Siénsia Sosiál husu deskulpa ho haraik aan,” husu reprezentante judisiáriu, José Fátima Xavier.
Judísiu da-lima, étapa daruak Fakuldade CISPOL UNITAL, mellor klasifikadu sira mak hanesan Filomena do Carmo husi AP ho valór 3,54, RI ho valór 3,21 no PD ho valór 3,0.
Graduasaun ne’e bazea ba despaxu dekanu, protokolu nú.01/5/FCISPOL/DA/IV/2018. Atribuisaun grau akadémiku ba judisiáriu sira ne’e, prevé ba konstituisaun Repúblika Demokrátika Timor-Leste, artigu 59, haktuir mós ba lei baze Ministériu Edukasaun nomós estatutu UNITAL nia rasik mós. Nune’e mós, despaxu magnífiku reitór, nú.02/R/I/2018.
Jornalista: Rafy Belo
Editor : Manuel Pinto
