DILI, (TATOLI) – Parlamentu Nasionál (PN) liuhusi votasaun iha debate Orsamentu Jerál Estadu (2019) espesialidade loron dahaat, aprova proposta númeru 40 husi bankada Partidu Demokrátiku (PD) ho votu a favor 56, kontra 0 no abstensaun 5.
Proposta ne’e aprezenta husi deputadu proponente nain haat husi PD hodi kapitaliza Banku Nasionál Komérsiu Timor-Leste (BNCTL-sigla portugés) ho montante milliaun $5, ne’ebé atu hasai husi dotasaun ba Governu, husi fundu rezerva kontijénsia.
Justifikasaun husi proposta ne’e, BNCTL durante ne’e fó kréditu maibé limite ba funsionáriu públiku sira de’it, tanba osan ne’ebé governu kapitaliza mós ladun boot, nune’e iha hanoin ho filosofia no polítika ida atu fó kréditu ba grupu agrikultór sira, hodi estimula vontade serbisu no hasa’e kresimentu produsaun.
Primeiru-Ministeru (PM), Taur Matan Ruak, konkorda ho proposta ne’e, mas fundu sei la foti husi kontijénsia maibé husi verba seluk.
Deputadu Bankada PD, Mariano Assanami Sabino, ne’ebé hanesan proponente fundamenta, tenke muda hanoin sosiedade atu halo negósiu, banku tenke fó kréditu, povu sira impresta no iha responsabilidade hodi fó fila.
“Iha sosiedade sira nia leet, ema fó kréditu ho funan boot no dalaruma ema laiha kbiit atu foti, tanba ne’e di’ak liu governu kapitaliza BNCTL, hodi povu ne’ebé programadu bele impresta ho funan kiik hodi fila liman no iha responsabilidade fó fila fali ba banku”, tenik iha plenária, sábadu (15/12).
Hodi akresenta mesmu iha proposta ne’e temi de’it ba setór agrikultura, maibé kréditu bele ba negósiu seluk tan, hodi fasilita mikro empreza sira ne’ebé disiplina no iha responsabilidade ho sira nia servisu.
Deputadu Bankada PD, Adriano do Nascimento, hanesan mós proponente reforsa durante ne’e banku estranjeiru la fó asesu kréditu ba povu sira no agora dadauk ema estranjeiru komesa domina ona kios kiik sira, enkuantu timoroan sira nia negósiu balun kuaze atu taka tanba labele halo kompetisaun.
Deputadu Bankada KHUNTO, Luis Roberto, apoiu proposta husi PD ne’e ho razaun durante ne’e agrikultor no negósiu kiik sira susar atu hetan kréditu, tanba kuaze funsionáriu públiku sira mak hetan asesu, tanba ne’e nia konsidera presiza duni kapitaliza hodi partisipasaun povu sira iha dezenvolvimentu ne’e iha.
Deputadu bankada FRETILIN, Joaquim dos Santos, hateten bainhira atu defende setór produtivu, desizaun polítika Governu mós tenke orienta dezenvolvimentu setór ne’e.
Jornalista: Julia Chatarina
Editora: Rita Almeida
