DILI, (TATOLI) – Movimentu Universitáriu Timor-Leste (MUTL) kontinua la konkorda polítika sosa kareta foun ba membru Parlamentu Nasionál iha Kinta Lejislatura, tanba ne’e reprezentante MUTL husu Xefe Estadu, Francisco Guterres Lú Olo, atu tetu orsamentu jerál Estadu (OJE) 2019.
“Ami husu ba Prezidente Repúblika (PR) atu tetu orsamentu jerál Estadu 2019 molok promulga, tanba orsamentu atu sosa kareta foun ne’e tama iha OJE 2019”, reprezentante MUTL, Noe Ximenes, ba jornalista sira iha Palásiu Prezidente Nicolau Lobato, Bairru Pité, tersa ne’e hafoin hamutuk ho nia belun sira hala’o enkontru ho Prezidente Repúblika.
Tuir nia aktu ne’ebé Prezidente Parlamentu Nasionál ho membru Parlamentu Nasionál sira halo ne’e la konsistente, tanba antes ne’e hatún ona despasu atu rekolla kareta tuan sira fó ba membru Parlamentu Nasionál foun atu uza maibé realidade kontinua sosa kareta.
“Parlamentu Nasionál hatún ona despasu para labele hola kareta, maibé tanbasá kontinua sosa kareta? Tanba ne’e ha’u hanoin kompeténsia ida ne’ebé Prezidente Repúblika tenke uza atu foti desizaun ne’ebé maka justu”, katak tan.
MUTL prefere atu deputadu sira uza de’it kareta tuan sira ne’ebé iha, tanba kondisaun kareta hirak ne’e sei di’ak hela.
Iha biban ne’e, Prezidente Repúblika, apresia ho MUTL tanba sei iha jerasaun ne’ebé iha kompromisu boot atu kontrola problema sosiál liu-liu orgaun Estadu no simu mós petisaun hosi MUTL, nune’e bele tetu orsamentu ba sosa kareta foun ba membru Parlamentu Nasionál ne’ebé kontempla iha OJE 2019.
Jornalista: Xisto Freitas
Editora: Rita Almeida
