Governu Sei Halo Estudu Ba Bee Ermera
DILI, (TATOLI) – Ministru Obras Públikas, Salvador Soares Pires, hatete kona-ba bee moos, governu iha planu atu halo estudu viabilidade ba bee iha munisípiu Ermera.
“Ita hanoin atu lori bee husi Ermera, tanba bee husi Glenu no Railaku iha Ermera, ita soe de’it ba Loes (Likisa), no nia sulin 2000litru/segundu, ida ne’e rikusoin ne’ebé ita soe de’it”, tenik iha debate espesialidade OJE 2019, kuarta ne’e.
Tuir nia problema perfurasaun kuandu foti bee husi rai no la enxe fali, sei iha invazaun tasi been no rai monu neneik-neneik tanba iha erozaun iha rai okos.
Governante ne’e argumenta kapitál iha sentru water treatment plan (planu ba tratamentu bee moos) haat iha Lahane, Dinamok Bekora, Kakaulidun no Manleu. Enkuantu problema agora mak tanba bee sentralizadu hotu iha sentru, bainhira ema ne’ebé dook husi fatin sentru fornesimentu bee, tanba sistema paralel, kuandu iha fugas sira ne’ebé mak dook husi sentru fornesimentu bee ne’e la hetan.
Nia dehan Governu anterior dezenvolve ona master plan (planu prinsipál) ba munisípiu lima hanesan Dili, Vikeke, Maunfahe, Lospalos no Baukau.
“Ba oin ami hanoin katak sosa design (dezeñu) detalladu ba infraestrutura foun iha Dili, ne’e importante tebes, iha tempu hanesan asesu ba bee moos indispensável ba povu sira”, katak.
Ba problema bee, iha proposta ba dotasaun orsamentu MOP ne’ebé prevee ona adisionál milliaun $11 atu halo manutensaun periódika, nune’e povu kontinua asesu ba bee moos no hein infraestrutura foun.
Nia akresenta tan agora dadauk depende ba 26 estasaun perfurasaun hodi sustenta bee moos.
Jornalista: Julia Chatarina
Editora: Rita Almeida
