DILI, (TATOLI) – Portavós estudante no dosente Universidade Orientál Timor Lorosa’e (UNITAL), Vicente Vias da Costa, liuhosi konferénsia imprensa iha eis-eskritóriu, World Vision Kaikoli, ohin, husu ba fundadór universidade atu halo konsensu ba nomeasaun reitór foun, Florindo Pereira.
“Ami konsidera katak nomeasaun no tomada de posse eis-reitór, Doutór Florindo Pereira, ba reitór daruak la tuir konsensu entre fundadór no prosedimentu legál, tanba universidade iha reitór ida suspense ho despaxu husi señor Maunana, nú. 02/P/FUNATIL/VII/2018, ho data 8 de jullu”, katak portavós.
Vicente Vias da Costa ejize ba fundadór sira tuur hamutuk hodi rezolve problema, liuliu Lere Anan Timur, tanba universidade ne’e to’o ohin loron sei hamrik tanba ninia lideransa no patrimónia sira iha universidade ne’e iha hotu ninia naran.
“UNITAL oras ne’e dadaun iha reitór na’in rua; ida legál no ida ilegál, ida ne’ebé mak atu fó graduasaun ba estudante finalista sira? Relasiona ho pontu hirak ne’ebé temi iha leten bele prezudika graduasaun estudante finalista sira nian”, kestiona Vicente Vias da Costa.
Portavóz ne’e husu ba responsável FUNATIL (Fundação de Aswa’in Timor Lorosa’e) no UNITAL nian atu labele fó kompeténsia ba estudante sira no utiliza hanesan instrumentu kontroladór iha universidade.
“Dala ida tan, ami husu ba responsável atu rezolve problema sira atu rezolve problema sira ne’ebé temi iha leten ho lalais, nune’e labele prejudika estudante sira. Karik la rezolve, ami sei kontinua hala’o asaun to’o hetan rezultadu di’ak ba UNITAL”, insiste.
Nomeasaun Ne’e Legál
Iha fatin ketak, reprezentante estudante UNITAL, Sebastião Notodane, liuhusi konferénsia imprensa iha Kampus UNITAL Bekora, ohin, konsidera nomeasaun reitór foun, Florindo Pereira, ne’e legál no tuir regra.
Sebastião Notodane konsidera konferénsia imprensa ne’ebé hala’o iha eis-eskritóriu, World Vision, Kaikoli ne’e ilegál, tan la’ós ona dosente, maibé sai ona husi UNITAL, tuir regra, la hala’o kna’ar ho másimu.
Entretantu, tuir dadus informasaun ne’ebé TATOLI asesu iha kampus UNITAL ho logotipu FUNATIL nian no asinadu husi Maunana, nu’udar prezidente atuál FUNATIL katak nomeiasaun reitór atuál Florindo Pereira haktuir ba despaxu prezidente FUNATIL, nú.04/D-PF/X/2018.
Nune’e, Prezidente FUNATIL, Maunana, hala’o pose ba reitór atuál UNITAL, Florindo Pereira, bazea ba termu pose nian no asinadu mós husi Prezidente FUNATIL, Maunana ho data 14 novembru, hodi reitór Florindo Pereira, bele lidera durante mandatu ba tinan lima. Katak, hahú husi 2018 to’o 2023.
Ajénsia TATOLI mós asesu iha kampus UNITAL kona-ba akta enkontru korpu Fundasaun nú.0110101018. Katak, iha loron 8 jullu 2018, iha reuniaun korpu fundasaun, ne’ebé haktuir reuniaun ne’e hala’o iha rezidénsa, Lere Anan Timur, Konselleiru FUNATIL.
Reuniaun ne’e, tuir akta ne’e hala’o tanba relasiona ho situasaun ne’ebé afeta ba universidade no fundasaun. Rezultadu husi reuniaun ne’e, tuir nafatin akta ne’e, mak hanesan; korpu fundasaun deside Lere Anan Timur asumu kargu nu’udar konselleiru ba FUNATIL.
Maunana asume kargu nu’udar Prezidente FUNATIL, Nixon asumi kargu nu’udar Vise-prezidente ba Fundasaun ba asuntu seguransa, polítika nasionál ho governu RDTL (Repúblika Demokrátika Timor-Leste), relasaun ho doadór sira no lukrutivu.
Matos asume kargu nu’udar Vise-prezidente FUNATIL ba asuntu Xefe Gabinete Permanente FUNATIL, finansa no portavóz FUNATIL.
Nunura asume kargu nu’udar Vise-prezidente FUNATIL ba asuntu edukasaun, rekursu umanu, administrasaun, infra-estrutura no planeamentu. Akta enkontru ne’e hetan asinatura ho data 08 jullu 2018.
Jornalista: Rafy Belo
Editora: Rita Almeida
