DILI, (TATOLI) – Polísia Nasionál Timor-Leste (PNTL) munisípiu Dili hamutuk ho Autoridade Inspesaun no Fiskalizasaun Atividade Ekonómika no Sanitária (AIFAESA) ohin halo operasaun konjunta hodi halo inspesaun ba loja sira ne’ebé fa’an fogete.
Komandante Investigasaun Munisípiu Dili, Mateus da Costa, hatete tuir orientasaun husi komandante munisípiu, PNTL sei la’o hamutuk ho AIFAESA atu halo inspesaun ba loja ne’ebé maka fa’an sasán liu prazu, liuliu ba materiál sensitivu sira hanesan fogete.
“Bainhira hetan, hamutuk ho AIFAESA ita bele halo apreensaun depois halo prosesu tuir lei ne’ebé iha. Polísia sei halo nafatin operasaun iha oras hotu, kualkér fatin ne’ebé deteta”, Mateus informa iha Kampung Baru bainhira hamutuk ho AIFAESA halo inspesaun ne’e.
Hatutan tan: “Tuir ministériu kompetente ne’ebé halo despaxu ida ba operasaun konjuta mai ona iha Polísia atu haree asuntu ida ne’e ho urjentemente”.
Tanba ne’e maka hahú husi 15 dezembru 2018 to’o 15 janeiru 2019 polísia sei halo operasaun iha oras 24 nia laran.
“Hetan iha fatin ne’ebé de’it, deteta, sempre halo apreensaun (foti) depois prosesu normál tenke levanta iha tribunál para haree ninia krime”.
Entretantu liuhusi operasaun ne’e seidauk hetan fogete ne’ebé fa’an iha loja sira ne’ebé tama, maibé iha Dili iha tempu kalan ema balun kontinua tiru fogete, tanba ne’e PNTL husu abitante Dili atu informa ba sira.
“Tarutu nafatin iha fatin-fatin, tanba ne’e maka polísia sempre apela ba komunidade kuandu hetan iha ne’ebé de’it, sé de’it maka atu hetan bele informa mai polísia, polísia bele bá iha fatin atu halo apreensaun”, Mateus aviza.
Diretór Operasaun AIFAESA, Gabriel da Costa, informa AIFAESA koopera ho PNTL Dili hodi halo inspesaun no lahetan fogete ne’e iha loja sira ne’ebé tama.
“Ita la’o duni, haree katak fogete ne’e iha loja ka supermerkadu ne’e ita lahetan buat ida, maibé husu nafatin ba komunidade sira bainhira hetan informasaun ruma liuliu kona-ba petasan ou buat ne’ebe ita nia lei bandu, kódigu penál númeru 211 hatete buat sira ne’e proibida labele fa’an iha ita-nia rai tanba ne’e krime”, nia dehan.
Iha inspesaun konjunta ba dahuluk ne’e hahú halo iha loja xinés iha Audian no Kampung Baru no sei kontinua ba loja sira seluk.
Jornalista: Maria Auxiliadora
Editora: Rita Almeida
