Lider no Funsionáriu Tenke iha Respeitu Mútua
DILI (TATOLI)- Ministériu Reforma Lejislativa no Asuntu Parlamentar (MRLAP) ho Sekretáriu Estadu Komunikasaun Sosiál (SEKOMS) realiza natal hamutuk ho funsionáriu diresaun sira hotu, inklui jornalista sira balun, ho almosu konfraternizasaun no divertimentu, hodi hametin liután lasu amizade.
Eventu Natal hamutuk ne’e realiza iha Nélio Restaurante, Kristu Rei, Díli, domingu (23/12) ne’e.
MRLAP, Fidelis Leite Magalhães, iha marjen eventu ne’e, hateten katak atu organizasaun ida susesu tenke iha serbisu hamutuk no respeitu ida mútua entre lider no funsionáriu sira-vise-versa tanba la iha organizasaun ida susesu se la ho serbisu ekipa no respeitu malu.
“Ho ministériu ida ne’e, ha’u espera katak ita lori kultura foun, atu nune’e de maneira ita serbisu, ho forma respeitu mútua, nakloke atu ita hotu bele sente katak vale apena ita kontribui ba instituisaun ne’e i vale apena fó vontade tomak, laran tomak ba instituisaun tanba ita hotu hetan respeitu no merese. Boas festa santu natál,” haklaken Ministru Fidelis Leite Magalhães.
Ho eventu ne’e, governante ne’e espera bele hametin liután ita, atu nune’e ita hotu hala’o bele serbisu di’ak liután no lori rezultadu di’ak liután iha MRLAP, iha tempu oin mai.
“Ba ha’u, importante mak serbisu hamutuk. Importante ita leno ita-nia aan ho forma kalma, atu nune’e bele iha komunikasaun ne’ebé di’ak, amizade ida ne’ebé di’ak,” subliña Ministru Fidelis Leite Magalhães.
Iha fatin hanesan, Sekretáriu Estadu Komunikasaun Sosiál, Merício Juvinal dos Reis “Akara” perante funsionáriu sira tomak hateten katak iha 2018 ne’e iha prosesu no dinámiku oioin, maibé ho dinámiku ne’e, tuir SEKOMS katak ita bele aprende ba malu kona-ba realidade, koñese malu di’ak liután. Nune’e mós buka reforsa vizaun, misaun, polítika no prioridade, la sees husi ita-nia kolaborasaun hotu.
Governante ne’e mós husu bkatak ita presiza iha konfiansa, konviksaun, diresaun sira halo komunikasaun ba malu, hodi realiza planu. Fiar iha lideransa, planu no idaidak asume responsabilidade, atu hala’o kna’ar ho péritu.
“Importante disiplina, fokus no iha responsabilidade. Boas festas santu natal. Espera ita hetan espiritu foun, enerjia foun,” dezeja Sekretáriu Estadu, Merício Juvinal dos Reis “Akara”.
Natal hamutuk no almosu konfraternizasaun MRLAP no SEKOMS ho funsionáriu husi diresaun oioin, inkluindu jornalista sira balun, partisipa mós, família husi funsionáriu sira. Eventu ne’e hahú tuku 10.00 to’o 18.00 lorokra’ik.
Jornalista: Rafy Belo
Editór : Manuel Pinto
