DILI (TATOLI)-Sekretáriu Estadu Komunikasaun Sosiál (SEKOMS), Merício Juvinal dos Reis “Akara” enkontru ohin dader ho Ministru Negósiu Estranjeiru no Kooperasaun (MNEK), Dionísio Babo Soares hodi partilla informasaun no koordena serbisu hodi divulga informasaun ba públiku liuhusi meius komunikasaun sira hanesan mídia.
“Hanesan membru governu, responsável ba komunikasaun sosiál, iha responsabilidade atu komunika ho ita-nia membru governu sira atu bele atualiza, hetan nafatin informasaun, para kualker meius komunikasaun ne’ebé iha ita konsidera importante para membru governu sira bele disemina atividade governativa ba ita-nia sidadaun,” informa Sekretáriu Estadu, Merício Akara ba Ajénsia Tatoli, iha edifísiu MNEK, Praia dos Coqueiros-Díli, ohin.
Sekretáriu Estadu, Merício Akara haktuir katak durante enkontru hetan informasaun mós husi MNEK kona-ba oinsa MNEK nia komunikasaun ho parseiru dezenvolvimentu husi rai li’ur, planu investimentu husi rai li’ur mai ita.
“Hanesan membru governu tutela ba komunikasaun sosiál, importante rona mós ita-nia membru governu sira-nia planu, prioridade, informasaun para ita bele divulga, disemina fali ba ita-nia sidadaun sira,” akresenta sekretáriu estadu.
Seidauk Informa Ajenda Vizita Cuba
Governante ne’e mós konfirma ba TATOLI katak durante enkontru iho MNEK, seidauk informa kona-ba konvite governu Cuba, liuhusi nia embaixadór iha Timor-Leste, Oscar Coet Blackstock, iha semana kotuk, atu partisipa iha konferénsia internasionál, ne’ebé liga ho Rede Rádiu no Televizaun Internasionál (RRTI), tanba konsidera sei kle’ur; juñu 2019.
“Enkontru ne’e sei kontinua. Ajenda seluk sei tuir mai, ami sei informa. Importante mak apoiu malu maka’as. Tanba ida ne’e, informasaun bele sai krédivel ba públiku,” informa Sekretáriu Estadu Komunikasaun Sosiál, Merício Juvinal dos Reis “Akara”.
Entretantu, durante enkontru TATOLI observa katak governante rua ne’e mós ko’alia asuntu diversu liga ho serbisu governu nian, ne’ebé la’o durante ne’e to’o ohin loron.
Jornalista: Rafy Belo
Editór : Manuel Pinto
