DÍLI, (TATOLI)-Reprezentante Ajénsia Notisioza Portugal, Lusa, iha Timor-Leste enkontru ho Sekretáriu Estadu Komunikasaun Sosiál, Rádiu no Televizaun Timor-Leste (RTTL, EP) no Ajénsia Notisioza Estadu Timor-Leste, TATOLI, IP hodi diskute kona-ba asuntu kooperasaun nian iha kontextu mídia iha prezente no ba futuru.
“Konvida husi sekretáriu estadu atu enkontru ho responsável másimu TATOLI nian no RTTL hodi diskute preliminár ida kona-ba saida mak Lusa bele ajuda ba TATOLI no RTTL hodi mellora no fornese serbisu,” informa Reprezentante Lusa, Jornalista António Sampaio ba TATOLI, hafoin enkontru, iha Palásiu Governu, Díli, ohin.
Prezensa Lusa iha Timor-Leste iha tinan barak nia laran ona no iha tinan kotuk halo ona proposta ida hodi ajuda TATOLI, ne´ebé iha tempu ne´ebá sei hanesan ANTIL. Ida ne´e la adianta.
“Ha´u hanoin, agora iha vontade foun hodi kontaktu ho Lusa, ha´u hanoin katak iha forma barak Lusa bele ajuda. Lusa iha kondisaun atu ajuda mellora servisu TATOLI no RTTL nian, iha buat ne´ebé Lusa bele ajuda,” dehan Reprezentante Lusa, Jornalista António Sampaio.
Lusa iha Timor-Leste ne´e dezde 1999. “Kontinua ho TATOLI no RTTL, ba halo proposta ida ho pedidu informasaun kona-ba área ne´ebé mak bele apoiu. Ami tenta atu ajuda depende interese TATOLI no RTTL nian,” nia informa.
Jornalista portugés ne´e informa mós katak Ajénsia Lusa serbisu mós iha Komunidade ba Nasaun sira ho Lian Portugés (CPLP-sigla portugés). “Ami sente orgullu kuandu serbisu hamutuk mós ho TATOLI,” hateten Jornalista António Sampaio.
Notísia relevante; http://www.tatoli.tl/2018/09/sekoms-buka-posibilidade-koopera-ho-lusa-reforsa-tatoli/
Jornalista: Rafy Belo
Editór : Manuel Pinto
