DÍLI, (TATOLI)- Komisaun Funsaun Públika (KFP-sigla portugés) halo enkontru nível altu ida ho Sekretáriu Estadu Komunikasaun Sosiál (SEKOMS) hodi ko’alia no deside kona-ba futuru funsionáriu públiku sira ne’ebe destaka iha Rádiu no Televizaun Timor-Leste (RTTL, EP). Iha enkontru ne’e iha pontu rua mak KFP, SEKOMS no RTTL-EP ko’alia.
Prezidente KFP, Faustinho Cardoso, hafoin enkontru, informa ba jornalista sira katak SEKOMS halo enkontru nível altu ida ho KFP nomós ho RTTL-EP hodi ko’alia kona-ba preparativu atu SEKOMS simu fila fali funsionáriu públiku sira ne’ebé durante tinan rua nia laran destakadu no serbisu iha RTTL-EP.
“Ami informa ba SEKOMS katak despaxu destakamentu funsionáriu iha RTTL ne’e sai ona. Ami komisaun husu ba SEKOMS hamutuk ho RTTL-EP atu asegura despaxu ida ne’e i bele to’o iha funsionáriu idaidak nia liman hodi nune’e sira akompaña prosesu fila fali ba iha SEKOMS ne’e,” informa Prezidente Faustinho Cardoso, iha Palásiu Governu, Díli, ohin lorokraik ne’e.
Nia informa katak ne’e pontu ida KFP ko’alia ho SEKOMS no SEKOMS no RTTL-EP prontu halo kópia hodi fahe ba funsionáriu sira. Segundu pontu mak ko’alia kona-ba nesesidade SEKOMS nian ba númeru funsionáriu husi RTTL-EP.
“Ami komisaun presiza hatene ho serteza númeru no se se? Kualifikasaun ida oinsá? Hodi nune’e sira ne’ebé mak la tama iha númeru sira ne’ebé iha ne’e, komisaun tenke halo komunikasaun ho instituisaun estadu sira seluk atu bele halo realokasaun bazea ba nesesidade instituisaun estadu, haree mós ba kualifikasaun idaidak ninian,” esplika prezidente KFP.
Lideransa másimu KFP, Faustinho Cardoso informa mós katak SEKOMS hato’o ona númeru ne’ebé mak sira prontu atu simu, haree ba fatin serbisu, meius serbisu ne’ebé mak disponível.
“Situasaun seluk mak ami ohin ko’alia mós kona-ba oinsa atu asegura sira-nia asisuidade, pontualidade serbisu i sira-nia dezempeñu,” nia realsa.
Kona-ba númeru ne’ebé SEKOMS atu simu ne’e, Prezidente KFP akresenta katak sira sente kontente tanba konsidera SEKOMS identifika ona espasu, serbisu fatin no tempu hanesan define ona serbisu saida mak sira tenke halo ba iha área lima ne’ebé mak SEKOMS identifika tiha ona.
“Sira ne’e mai hatene ona sei halo saida, tuir área lima ne’ebé mak iha. Ne’e ami-nia urjénsia, ami lakohi funsionáriu sira mai hamriik hanesan ema ba hola ikan, ka ba merkadu. Ami lakohi ida ne’e tanba iha ligasaun ho dignidade pesoál funsionáriu sira nian,” nia konsidera.
Prezidente KFP, Faustinho Cardoso konsidera mós katak funsionáriu públiku sira ne’ebé destakadu iha RTTL-EP ne’e pesoál profisionál tanba ne’e sira mai tenke iha fatin ne’ebé apropriadu, meius ne’ebé disponível hodi asegura sira-nia serbisu ho di’ak.
“Ne’ebé, ami hetan garantia ona kona-ba kestaun ida ne’e, husi parte SEKOMS nian,” garante lider másimu KFP ne’e.
1 Fevereiru Eventu “Simu”
Prezidente KFP, Faustinho Cardoso informa tan katak instituisaun tolu hanesan KFP, SEKOMS no RTTL-EP sei hamutuk realiza eventu “simu” funsionáriu sira ne’e iha edifísiu KFP, Matadouro, Dili, tempu badak ne’e.
“Hahú husi dia um ne’e sira mai fali ona SEKOMS, sei serbisu ba SEKOMS, depois komisaun sei halo komunikasaun mós nafatin ho SEKOMS atu oinsa realoka fila fali funsionáriu sira ne’ebé mak liuhusi nesesidade SEKOMS nian,” nia informa.
Prezidente Faustinho Cardoso informa liután katak funsionáriu públiku hothotu ne’ebé destakadu iha RTTL-EP ne’e mai, fila fali hotu iha SEKOMS, kuaze ema na’in 105.
“SEKOMS nia nesesidade ne’e talvez la to’o métade husi ne’ebá. Signifika sira barak liu mak Komisaun Funsaun Públika presiza halo komunikasaun ho instituisaun estadu sira, tantu iha nível nasionál nune’e mós munisípiu sira atu oinsa haree hodi halo realokasaun ba sira tuir nesesidade instituidsaun sira estadu nian,” konklui prezidente KFP.
Jornalista: Rafy Belo
Editór : Manuel Pinto
