ERMERA, (TATOLI)-Estudante iha Ensinu Sekundária Jerál, Nino Konis Santana (NKS), Gleno- Ermera, hamutuk na´in 2.272 no profesór sira hamutuk 66 nomós profesór internasionál na´in ida hodi hanorin lian inglés nomós kada tinan hetan apoiu husi PBI (Pusat Budaya Indonesia), iha Timor-Leste, hodi hanorin dalen indonézia. Difikuldade ne´ebé iha mak meza kadeira no sala la to´o ba estudante sira.
Informasaun ne´e relata husi Diretór Ensinu Sekundária Jerál, Nino Konis Santana (NKS), Gleno-Ermera vila, Munisípiu Ermera, António da Costa Alves, iha eskola NKS, ohin.
“Estudante barak maibé ami-nia aredór eskola kloot no ninia fasilidade la kumpletu,” haktuir Diretór António da Costa Alves.
Tanba ne´e, iha okaziaun vizita ekipa delegasaun korida ba paz internasionál Sri Chinmoy, diretór eskola púbika ne´e mós hato´o proposta rua. “Ami-nia proposta rua, ida ba delegasaun ´peace run´. Ida dirije ba família Surakarta,” hateten diretór ensinu Sekundáriu NKS, Gleno-Ermera.
Diretór eskola NKS, António da Costa Alves haktuir katak ho númeru estudante ne´ebé barak no sala aula ne´ebé limitadu mak atu garante no jere prosesu aprendizajen, sira fahe ba aula dader no lorokra´ik. “Desimu primeiru anu ho segundu anu ne´e ba dader no desimu anu ba lorokra´ik”.
Enkuantu, Diretór Ensinu Báziku Sentrál 4 Setembru Railaco Vila, Munisípiu Ermera, Sebastião Oliveira, iha fatin ketak, relata mós katak totál estudante sira iha estabelesimentu ensinu ne´e hamutuk na´in 561 no profesór voluntáriu hamutuk na´in neen. Inklui, profesór permanente sira ne´ebé hakna´ar aan iha eskola ne´e.
“Entre estudante sira ne´e ami fahe ba sala sia ho totál kada sala ne´e ami iha estudante maizmenus na´in 60 kada sala,” relata Diretór Sebastião de Oliveira.
Profesór ne´e mós relata katak Ensinu Báziku 4 Setembru iha mós sentru formasaun rua; sentru formasaun inglés ne´ebé mak hetan kooperasaun husi ´Friends of Ermera´ ka ´Amigos de Ermera´ ho biblioteka ida ne´ebé alende funsiona hanesan biblioteka maibé mós hanesan sentru ba prátika língua portugeza.
“Enjeralmente ami iha meza no kadeira ne´ebé mak natoon. Informa mós katak iha fatin ida ne´e, la iha lutu,” dehan Diretór Sebastião Oliveira, iha eskola Ensinu Báziku Sentrál 4 Setembru Railaco Vila.
Diretór Edukasaun Munisipál Ermera, Carlos Salsinha akresenta, perante mídia sira katak relasiona ho preokupasaun profesór sira nian, edukasaun munisipál nian tau ona iha planu oinsa bele responde. “Loos duni katak estudante iha munisípiu Ermera (iha eskola Nino Konis Santana) ne´e elevadu loos. Ita rezolve fazeadamente. Agora kuaze infrastrutura lubuk ida mak Ministériu Edukasaun responde ona mezmu ita haree seidauk to´o”.
“Responsabilidade ministériu nian buka nafatin atu responde preokupasaun sira ne´ebé mak diretór ka profesór sira hato´o. Ministériu Edukasaun la tuur nonok mas oinsa tau ona iha planu para atu responde. Karik, impase polítika ne´e hotu, ita bele tau osan ba iha konstrusaun ne´ebé mak iha. Iha mós planu dezenvolvimentu munisípiu, ita mós mensiona iha planu integradu dezenvolvimentu munisípiu Ermera nian,” nia garante.
Jornalista: Rafy Belo
Editór : Manuel Pinto
