DILI, (TATOLI) – Primeiru-Ministru, Taur Matan Ruak, husu ba públiku atu labele tau ba Prezidente Repúblika (PR) nia ibun enkuantu Xefe Estadu rasik seidauk veta.
“Prezidente Repúblika seidauk veta maibé ita dún no tau ba nia ibun atu veta ne’e halo nusa? Ita labele tau buat ne’ebé Prezidente Repúblika rasik la hanoin iha nia ibun”, Xefe Governu ba jornalista sira iha Palásiu Prezidente Nicolau Lobato, Bairru Pité, kinta ne’e relasiona ho prosesu alterasaun Orsamentu Jerál Estadu (OJE) 2019 ne’ebé oras ne’e iha hikas ona Xefe Estadu nia liman.
Nia dehan alterasaun OJE 2019 ne’e nu’udar orsamentu foun entaun Prezidente Repúblika iha prazu loron 30 nia laran atu estuda.
Taur hatutan períodu loron 30 nia laran Prezidente Repúblika sei ezérse kompeténsia para hasai desizaun tuir konsiénsia rasik.
Primeiru-Ministru mós hato’o ona ba Prezidente Repúblika katak iha fevereiru nia laran ne’e Governu sei avansa ho orsamentu duo-désimu no antes ne’e mós Xefe Governu deklara Governu sei husu autorizasaun ba Parlamentu Nasionál atu hasai orsamentu hodi finánsia mákina Estadu bainhira OJE seidauk promulgadu.
Kona-ba alterasaun Lei Atividade Petrolífera ne’ebé oras ne’e iha Tribunál Rekursu nia liman atu verifika ninia legalidade, Taur hatán enkuantu Tribunál seidauk deklara katak hapara sosa asaun Conoco Philips no Shell Energy, prosesu kontinua la’o normál.
Jornalista: Xisto Freitas
Editora: Rita Almeida
