DILI, (TATOLI) – Governu liuhosi Ministru Reforma Lejislativa no Asuntu Parlamentár, Fídelis Leite Magalhães, afirma Governu liuhosi Xefe Ezekutivu, Taur Matan Ruak, kontinua mantein lista kandidatu membru governu ne’ebé durante ne’e sei pendente.
“Pozisaun governu nian, liuliu Primeiru-Ministru nian mantein nafatin lista naran ne’ebé aprezenta uluk, ita seidauk iha hanoin atu substitui naran ne’ebé lori ona ba Prezidente Repúblika”, Ministru Fidelis ba jornalista sira iha parlamentu, hafoin hala’o reuniaun ho lider bankada sira, ohin.
Fidelis akresenta kandidatu membru governu sei nafatin ho lista uluk. Tanba Primeiru-Ministru kada semana hasoru Xefe Estadu maibé mantein nafatin ho ida ne’e.
Maibé ba kualker governu ne’ebé mak ideál, tenke iha estrutura governu kompletu, basa Prezidente Repúblika seidauk fó pose, ida ne’e bele hamosu implikasaun barak.
Tanba Governu ideál liu mak tutela polítika, sira ne’ebé mak okupa kargu polítiku atu superviziona servisu ka orienta politikamente servisu ministériu nian.
Nune’e mós, lider Partidu Demokrátiku, Mariano Assanami Sabino, kestiona mós ministériu sira seidauk iha nia ministru, nia impaktu ba ezekusaun orsamentu.
“Se ministériu ida mak laiha ulun, ida ne’e problema, ida ne’e presiza haree didiak. Tanba OJE promulga ona, tenke fó atensaun ba asuntu membru governu ne’ebé seidauk kompletu”, fó esperansa.
Assanami akresenta membru governu tenke kompletu atu bele servisu di’ak, ezekuta polítika hodi aselera dezenvolvimentu.
“Governu tenke kompletu duni, ita labele halimar barak iha polítika, maibé povu susar hela ba edukasaun, saúde, agrikultura”, afirma.
Tanba ne’e mak la iha razaun atu muda ka tunda fali kandidatu membru governu hirak ne’ebé ladauk hetan pose, maibé tenke tuur hodi diskute hamutuk, nune’e bele solusiona.
Nune’e, lideransa demokrátiku husu ba Prezidente Repúblika ho Primeiru-Ministru tenke buka dalan ona hodi rezolve, nune’e governu bele iha kualidade hodi servi povu no nasaun.
Nune’e mós hatan ba ministériu sia ne’ebé mak seidauk hetan ministru, Xefe Bankada Frente Revolusionária Timor-Leste Independente (FRETILIN), Francisco Branco, hatan ida ne’e kompeténsia Xefe Ezekutivu ho Xefe Estadu.
Entretantu, kandidatu membru governu ne’ebé seidauk hetan pose mak Francisco Kalbuadi Lay, Helder Lopes, Virgilio Smith, Jacinto Rigoberto, Tomas Cabral, José Turquel, Amandio Benevides. Hanesan kandidatu Kay Rala Xanana Gusmão antes ne’e rejigna-án inklui Antonio Verdial.
Jornalista: Zezito Silva
Editora: Rita Almeida
