DILI, (TATOLI) – Vise Xefe Bankada Frente Revolusionária Timor-Leste Independente (FRETILIN), Francisco Miranda Branco, konsidera promulgasaun Orsamentu Jerál Estadu (OJE) 2019 hosi Prezidente Repúblika, Francisco Guterres Lú Olo, bele hamenus ona tensaun públiku.
Entretantu tuir lider Partidu Demokrátiku (PD), Mariano Asanami Sabino, husu ba governu atu hakotu impase durante nasaun ne’e hasoru ho ezekusaun ne’ebé di’ak ba dezenvolvimentu nasionál.
“Antes ne’e kompañia barak mak taka ona, ema barak lakon servisu, maibé orsamentu ne’ebé promulga ona hosi Prezidente Repúblika bele hamenus ona tensaun públiku”, Branco ba jornalista sira iha uma fuku parlamentu, ohin.
Tanba ne’e, opozisaun respeita promulgasaun OJE hosi Xefe Estadu maske hanoin la hanesan maibé nia (Prezidente) hanoin klean liu, tanba haree hosi situasaun globál iha rai-laran, hanesan hosi aspetu sosiál, ekonómiku no polítiku.
Branco reafirma maske Prezidente Repúblika hasai ona desizaun hodi promulga orsamentu, maibé opozisaun nafatin diskorda, tanba setór importante hanesan edukasaun, saúde, agrikultura, infraestrutura bázika la tau orsamentu ne’ebé sufisiénte.
Tuir deputadu PD, Assanami Sabino, desizaun ba promulgasaun hatudu pasu pozitivu atu governu bele halo dezenvolvimentu.
Nia akresenta durante impase fó impaktu tebes ba setór hotu, hanesan ekonomia; haree hosi investimentu lubuk ida lakohi mai, no balun mai maibé fila fali, nune’e mós balun iha ona maibé taka, hanesan akontese iha supermerkadu no ótel balun.
Nia dehan tan la’ós setór ekonomia de’it maibé setór sosiál afetadu. Tanba iha fatin sira balun halo ona konflitu hanesan baku malu, ida ne’e mai hosi impaktu dezempregu, ema barak lakon servisu.
“Ita la sente ema barak lakon servisu, maibé ida ne’e responsabilidade ba polítiku sira nian, tenke rezolve duni”, dehan.
Assanami espera OJE ne’ebé hetan ona promulgasaun iha 7 fevereiru horiseik bele rezolve ona impase.
Entretantu, orsamentu ne’ebé Prezidente Repúblika promulga liuhosi análize profunda, relasiona ho vizaun médiu no longu prazu no iha situasaun oioin iha loron hirak tuir mai, nune’e Xefe Estadu simu reapresiasaun OJE hosi parlamentu iha 1 fevereitu ho montante billiaun $1.482 hosi proposta inisiál billiaun $2.1.
Jornalista: Zezito Silva
Editora: Rita Almeida
