DILI, (TATOLI) – Ministériu Ensinu Superiór, Siénsia no Kultura (MESSK) sei estabelese dormitóriu ba estudante sira ne’ebé hala’o estudu iha ensinu superiór, Institutu Politékniku Betanu (IPB), ne’ebé lokaliza iha munisípiu Manufahi.
“Agora dadaun governu oferese hela subsídiu, kada estudante ida 30 dolár. Ne’e hahú husi inísiu até agora, 30 dolár ne’e husi planu ne’ebé Ministériu Ensinu Superiór agora dadaun iha atu prepara dormitóriu ba sira”, katak ministru ba Tatoli iha Palásiu Governu hafoin partisipa enkontru Konsellu Ministru, ohin.
Governante ne’e rekoñese ekipamentu sira iha IPB ne’e agora sei mukit, tanba ne’e mak iha governu da-ualu tau prioridade atu haree oinsá atu moderniza instituisaun ne’e para atrai estudante sira.
Purtantu, IPB dadaun iha kursu rua; konstrusaun sívil no produsaun animál. Agora dadaun menus ekipamentu iha prátika.
Paulino Ribeiro, Vise-prezidente IPB, iha 2017 liuhusi nia deklarasaun ba jornalista sira bainhira partisipa semináriu kona-ba ensinu superiór no empregu, iha edifísiu Ministériu Finansa (MF) Aitarak laran katak distánsia IPB nian no fasilidade prátika ne’ebé seidauk iha dezmotiva estudante sira atu estuda.
Nia dehan atu rezolve preokupasaun estudante sira nian, IPB halo konkursu no dezeña dormitóriu ba estudante sira no BoQ (Bill of Quantity) hotu ona.
Enkuantu hein dormitóriu, oras ne’e dadaun estudante sira sei hela iha uma MDG’s (Millenium Development Goal’s) no hela iha komunidade nia uma.
Nune’e mós fasilidade prátika nian tama ona iha konkursu, kompañia sira hola ona ekipamentu prátika nian, hein de’it janeiru ka fim dezembru (2017/2018) sasan sira ne’e to’o ona, bele ba iha Institutu Politékniku Betanu.
Jornalista: Rafy Belo
Editora: Rita Almeida
