DILI, (TATOLI) – Sekretáriu Estadu Komunikasaun Sosiál (SEKOMS), Merício Juvinal dos Reis Akara, hateten Timor-Leste ho Portugal nu’udar parseiru estratéjiku inkluzivamente ba SEKOMS.
Tanba ne’e, SEKOMS enkontru ho embaixadór Portugal iha Timor-Leste, José Pedro Machado Viera, hodi ko’alia kona-ba kooperasaun, apoiu RTTL-EP no Ajénsia TATOLI.IP iha aspetu divulgasaun no konsolidasaun língua portugeza.
“Enkontru importante. Timor ho Portugal parseiru estratéjiku liliu iha área komunikasaun sosiál”, dehan Merício Juvinal dos Reis Akara ba jornalista sira, iha Pálasiu Governu, ohin.
SEKOMS reforsa enkontru ne’e importante, tanba ne’e SEKOMS hamutuk ho prezidente Rádiu Televizaun Timor-Leste (RTTL-EP), Francisco da Silva Gary, ho Prezidente Ajénsia Notísia Estadu Timor-Leste, TATOLI.IP, José da Costa, diskute pontu importante sira kona-ba kolaborasaun entre RTTL-EP ho RTP (Radíu Televizaun Portugal) oinsa reforsa di’ak liután, inklui TATOLI.IP.
“Durante ne’e iha ona serbisu hamutuk, maibé oinsa reforsa, diskute kle’an liután kona-ba programa, konteúdu. Ha’u mós dehan iha programa espesiál ida ba labarik sira para bele aprende língua portugés liuhusi televizaun, sira bele aproveita aprende portugés”.
“Entaun, iha nível tékniku RTTL, RTP sei diskute, liliu kooperasaun ho embaixada Portugal iha Timor para kooperasaun entre Ajénsia TATOLI ho Ajénsia Lusa bele kontinua apoia malu iha nível formasaun, apoiu tékniku oinsá bele promove língua portugeza. Tanba dadaun ne’e maioria produz iha língua tetun maibé agora ba oin, kooperasaun ba oin hadi’a para versaun portugés hasa’e maka’as liután para ita bele divulga ba mundu”, reforsa.
Governante ne’e kontente ho formasaun língua portugeza ne’ebé mak durante ne’e fó ba jornalista sira liuhusi programa konsultóriu língua, tanba nia rezultadu di’ak.
“Ha’u ko’alia ho señor embaixadór atu prosesu ne’e kontinua i oinsá bele alarga di’ak liután ba nível munisípiu”, dehan governante ne’e.
Tanba, tuir Akara formadór sira fasilita ona formasaun língua ba timoroan sira no bainhira timoroan iha kapasidade bele sai formadór ba iha nível munisípiu.
Nia akresenta sei haree formadór língua ne’ebé di’ak hodi apoiu RTTL-EP, inklui ajénsia ofisiál estadu timorense.
“Balun konsege hetan formasaun di’ak, valór di’ak, ita sei konsidera, ko’alia ho sira oinsá sira-nia kontribuisaun”, afirma.
Iha fatin hanesan, Embaixadór Portugal ba Timor-Leste, José Pedro Machado Vieira, hatutan enkontru ne’e ko’alia ba kooperasaun entre Portugal ho Timor-Leste iha área komunikasaun sosiál nian.
“Ami serbisu direta ho sekretáriu estadu (Merício Akara) no SEKOMS enjerál hodi kontinua apoia komunikasaun sosiál ho portugés”.
“Ami mós ko’alia kona-ba konsultóriu língua ba jornalista sira ne’ebé mak iha susesu barak iha kapasitasaun ba jornalista timoroan sira”, konklui diplomata portugés, José Pedro Machado Viera.
Jornalista: Rafy Belo
Editora: Rita Almeida
