iklan

NASIONÁL, INTERNASIONÁL, POLÍTIKA

Pesoa Eminente Sei La Duplika Serbisu Embaixadór ASEAN Sira

Pesoa Eminente Sei La Duplika Serbisu Embaixadór ASEAN Sira

Diretór Jerál Asuntu ASEAN, José Trindade Neves. Foto: MNEK

DILI, (TATOLI) – Rezolusaun Ministériu Negósiu Estranjériu no Kooperasaun (MNEK), ne’ebé aprova ona husi Konsellu-Ministru horseik atu nomea pesoa eminente ida hodi reprezenta Timor-Leste promove nasaun ba organizasaun nasaun naklibur sira iha rejiaun sudeste azíatika (ASEAN-sigla inglés) la duplika serbisu embaixadór timoroan sira ba ASEAN maibé halo advokásia.

“La duplika buat ida porque embaixadór sira kontinua hala’o sira-nia knaar hanesan ‘manu ain’ Timór nian iha li’ur, ko’alia nafatin ho sira-nia omologu iha li’ur ho Ministériu Negósiu Estranjeiru ou sira ne’ebé mak kaer pasta ASEAN nian”, hateten Diretór Jorge Camões, iha nia knaar fatin MNEK, Praia dos Coqueiros, ohin.

Diretór reforsa iha Timor-Leste ne’e fó apoiu tan de’it ba embaixadór timoroan sira iha ASEAN ne’e.

“Purezemplu, karik ita hakarak organiza semináriu ruma iha li’ur, ita iha ema balun ne’ebé ita hanoin bele, atu sai oradór iha li’ur esplika ba ita-nia audiénsia sira iha ne’ebá kona-ba polítika rai laran ou kona-ba dezenvolvimentu ou progresu dezenvolvimentu iha rai li’ur, bele esplika iha ne’ebá”.

“Bele bolu eis-ministru balun tan mós ba esplika iha rai li’ur atu ema haree katak progresu ekonomia, progresu dezenvolvimentu iha Timór ne’e mezmu neneik mas la’o nafatin. Ita avansa nafatin atu hatudu nafatin ita-nia commitment (kompromisu-red) hotu katak situasaun la’o di’ak hela, ita prontu atu integra ba ASEAN”, reforsa.

Diretór Jorge Camões konfirma Timor-Leste mós prontu diskute ho membru definitivu ASEAN sira kona-ba área espesífika balun no prontu komunika ho sira hodi ko’alia kona-ba área ne’ebé sei sai preokupasaun ba ASEAN.

Katak, Timor-Leste tenta buka dalan atu responde ASEAN nia preokupasaun no ezijénsia. “Ida ne’e mak ita hakarak halo ho entidade hothotu. Ida ne’e mak ha’u bele dehan, sira ba ne’e la’ós atu overlapping fali kna’ar mak iha ona”, realsa.

“Ami mós iha ne’e haree oinsá atu envolve liña ministeriál hotu, iha grupu traballu ba ASEAN ninian. La overlapping buat ida. Felizmente ida ne’e atu haforsa liu katak parte ekonomia ninian ema sira tenke diskute hamutuk buka dalan, nune’e mós polítika ninian, sósiu-kulturál nian. Ne’ebé, la overlapping malu maibé atu haforsa liután ita-nia esforsu hothotu ba ASEAN”.

Diretór Jerál Asuntu ASEAN, José Trindade Neves Camões, mós katak MNEK sei tenta atu fahe informasaun ba embaixadór timoroan sira kona-ba inisiativa ne’e.

“Ami komunika ona ho embaixada sira katak ita sei iha programa advokasia ASEAN ninian iha nivel embaixada. Ne’ebé, embaixada bele organiza eventu balun iha ne’e, depois ita haruka rekursu iha ne’e ba atu fó apoiu ba sira”, tenik tan.

“Sira halo iha ne’ebá, depois ita lori evidénsia ba. Sira organiza eventu sira ne’e, iha buat balun, ita haruka fasilidade atu nune’e bele apoiu liután misaun sira iha li’ur. Ne’ebé, la overlapping buat ida”, reforsa tan.

Iha fatin hanesan, Diretór Jerál Asuntu ASEAN, José Trindade Neves Camões, afirma rezolusaun Konsellu-ministru ne’e atu fó kompeténsia ba Ministériu Negósiu Estranjeiru no Kooperasaun (MNEK) atu haree pesoa eminente ho nasionalidade nu’udar timoron, iha kbiit no koñesimentu luan atu tulun governu hodi halo advokasia iha rai laran no li’ur, hodi bele konvense ASEAN atu ita bele integra iha tempu oin.

“Pesoa eminente ne’e, ita la define dehan sé? Maibé, konsellu-ministru fó kbiit, mandatu ba señor ministru atu haree se mak nia hanoin bele atu tulun Ministériu Negósiu Estranjeiru, atu tulun governu, tulun ita-nia misaun sira iha rai li’ur atu halo advokasia ne’e”, realsa.

Nia esplika pesoa eminente ne’e maka eis-prezidente sira, eis-primeiru-ministru sira, eis-ministru negósiu estranjeiru no kooperasaun sira no sira seluk tan ne’ebé mak ministru hanoin bele kontribui ba prosesu adezaun ASEAN ninian. “Horseik ne’e la indika A, B ka C maibé fó kbiit atu ministru haree no deside sé?”.

Koordenasaun La’o Hela

Diretór Jerál Asuntu ASEAN, José Trindade Neves Camões, konfirma koordenasaun MNEK ho liña ministeriál sira, iha semana hirak liubá, iha fin janeiru, hodi haree no prepara án di’ak atu antesipa “fact finding mission” ninian husi ASEAN ninian.

“Koordenasaun la’o hela, husi diresaun sira kontaktu hela ho liña ministeriál haree oinsá bele partilla informasaun atu bele simu vizita ida ne’ebé mak atu mai. Sira indika ona, iha maiu nia laran, maibé sira sei halo komunikasaun internu entre sekretária ho membru ASEAN sira”, afirma tan.

“Kuandu iha ona desizaun, sira sei formalmente informa mai ita kona-ba vizita ne’e. Sira indika, ita mós esplika verbalmente katak  prontu atu simu. Ne’ebé, komunikasaun formál sira sei hato’o mai ita tempu badak”, konklui.

Enkuantu, Ministru Negósiu Estranjeiru no Kooperasaun, Dionísio Babo Soares, hafoin sorumutu Konsellu-ministru, horiseik ba jornalista sira katak kna’ar husi pesoa eminente ne’e maka halo polítika, kampaña no koordenasaun ho nasaun membru sira para aselera prosesu adezaun.

Ho aprovasaun rezolusaun ne’e, fó ona poder ba MNEK hodi nomea eminente ne’e hodi apoiu serbisu ministériu nian.

Jornalista: Rafy Belo

Editora: Rita Almeida

iklan
iklan

Leave a Reply

iklan
error: Content is protected !!