ATAÚRU, (TATOLI) – Atu halo Ataúru matak, espoza Prezidente Repúblika, Cidália Lopes Mouzinho, liuhusi programa “Sidadaun Ida Ai-Oan Ida” simbólikamente kuda ai iha Illa ne’e.
Ai-oan ne’ebé maka atu kuda ne’e iha variasaun ho totál hamutuk 1000 resin ne’ebé maka sei kuda iha suku Beloi, Bikeli, Makili, Makadadi no Vila Mau-Meta.
Espoza Prezidente ne’e relata iha janeiru ne’e Prezidente Repúblika halo ona lansamentu ba programa kuda ai-oan ho tema “Sidadaun Ida Ai-Oan Ida” hanesan kompromisu eleitorál ne’ebé halo atu halo matak país ne’ebé maka foin realiza iha tempu udan ne’e no halo uluk ona iha Dili nomós munisípiu balun ne’ebé maka estudante no joven sira mós kuda.
“Tanba ita hakarak atu kuda ai-oan ne’e to’o milliaun ida, atu ita-nia rai ne’e matak. Ataúru ha’u maka hili duni atu mai halo programa kuda ai-oan ida ne’e”, Cidália afirma iha atividade kuda ai iha suku Beloi, ohin.
Nia hatutan hili Ataúru hodi halo atividade kuda ne’e, tanba bainhira udan hateke nia matak duni, maibé iha bailoro bainhira ho ró iha tasi hateke rai ne’e fatuk iha foho leten haree moos loos, tanba ne’e maka presiza kuda ai-oan.
Hafoin kuda, espoza PR husu atu rezidente Ataúru tenke kuída, liuliu autoridade lokál sira atu fó atensaun nomós husi Prezidénsia Repúblika nian atu observa nafatin oinsá ai-oan sira ne’e moris ka la’e no karik mate bele kuda fali no husu parte hotu nia kolaborasaun atu kuidadu hamutuk.
“Ita-nia rai ne’e presiza duni ai-horis, tanba agora rai ne’e sente manas tebes hanesan rai barak mós sente”.
Relasiona ho ai-oan ne’ebé kuda iha Illa ne’e, maibé bee susar maka Cidália dehan ne’e mós sai preokupasaun no aproveita tempu udan para ai-hun sira ne’e bele moris hafoin tama bailoron.
Ai-oan sira ne’ebé kuda ne’e maka saburaka, nú, kulu-jaka, has, no ai sira ne’ebé iha funan no ai-hun boot sira no sei iha ai sira ne’ebé sei kuda iha tasi-ibun.
Xefe Suku Beloi agradese tebes ba programa kuda ai-oan ne’e, tanba bele hetan apoiu ai-horis husi Prezidénsia Repúblika hodi kuda iha suku ne’e no ida ne’e mós oinsá atu fó hanoin ba abitante sira katak la’ós hein de’it Estadu, maibé bele halo netik buat ruma.
“La’ós ne’e de’it, mas ami ho joven balun koko prepara ai-horis balun kuda atu halo konservasaun ba bee-matan”.
Ho ai-oan sira ne’ebé kuda ona ne’e autoridade lokál ne’e garante katak nia sei moris, enkuantu animál abitante sira-nian ne’ebé husik livre hela no sei fó hanoin ba rezidente sira kona-ba ida ne’e.
“Tanba iha mós lei atu regula kona-ba animál sira ne’ebé husik, maibé ami fó hanoin sira (abitante)”.
Portavós joven suku Beloi, Afonso Soares, agradese ba planu di’ak hosi PR nian hodi kuda ai-oan ne’e hodi fó ambiente ne’ebé di’ak no proteje Ataúru.
Tanba ne’e joven Beloi prontu atu tau-matan ba ai-oan ne’ebé kuda hodi bele moris di’ak tanba ai ne’e bainhira moris nia benefísiu barak.
Aleinde kuda ai-oan iha suku Beloi, kuda mós iha suku Vila Mau-Meta no monumentu desteradu Ataúru no iha okaziaun ne’e espoza PR halo mós vizita ba semiteriu iha suku Vila Mau-Meta.
Atividade ne’e partisipa mós espoza Komandante Jerál PNTL, Júlio Hornay, espoza Majór Jenerál, Lere Anan Timur ho nia komitiva, no Prezidente Konsellu Nasionál Juventude Timor-Leste (CNJTL).
Jornalista: Maria Auxiliadora
Editora: Rita Almeida
