BCTL Aprezenta Implementasaun Sistema Garantia Kréditu Ba KM
DILI, (TATOLI) – Governadór Banku Sentrál Timor-Leste (BCTL, sigla iha portugés), Abraão de Vasconselos, aprezenta implementasaun Sistema Garantia Kréditu iha reuniaun Konsellu Ministru (KM), ohin.
“Konsellu Ministru rona aprezentasaun no apresia, agora hahú implementasaun, mas ohin bázikamente mai halo aprezentasaun ba buat ne’ebé aprezenta ona iha tinan kotuk no agora mai halo aprezentasaun badak ida hodi Konsellu Ministru apresia regulamentu saida maka Banku Sentrál prepara”, Abraão hatete ba jornalista sira iha Palásiu Governu, hafoin aprezentasaun.
Atu nune’e bainhira implementa, ema ne’ebé foti kréditu atu finansia iha setór agrikultura, turizmu, indústria, pekuária ka halo otél ki’ik ida iha Tutuala ka Marobo ne’e nia asesu fasilidade kréditu iha banku komersiál ida ne’e maka sistema garantia bele garante kréditu ba sira ne’ebé foti husi banku sira ne’e.
Governadór ne’e dehan iha aprezentasaun ne’e sobre prosedimentu, kestaun polítika balu, risku hira maka sistema ne’e tenke asume iha kréditu ne’ebé banku fó no nia durasaun másima to’o tinan hira.
“Taxa de juru mós ohin diskute hotu no taxa de juru ne’ebé ralativamente ki’ikoan liu kompara ho taxa de juru hanesan kréditu baibain”, katak.
Daudaun ne’e iha banku komersiál tolu maka espresa sira-nia interese hakarak atu partisipa mak Banku Nasionál Komérsiu Timor-Leste (BNCTL-sigla portugés), Banku Nasionál Ultramarinu (BNU), no Banku Mandiri ne’ebé sei iha hela prosesu halo revizaun, desizaun finál seidauk iha, mas pelu menus banku rua hakarak atu partisipa.
Ba Sistema Garantia Kréditu ne’e Governu prevee milliaun $4 atu fasilita kréditu ba empreza ki’ik no média sira.
“Milliaun haat ne’e la’ós montante ida boot, mas ida ne’e ita hahú depois haree fulan haat, lima ninia implementasaun ne’e oinsá? Ha’u hanoin Governu, Parlamentu iha interese boot tebes oinsá atu promove, dezenvolve ita-nia setór privadu”.
lha 30 maiu 2017, iha Sestu Governu Konstitusionál, Ministru Estadu, Koordenadór Asuntu Ekonómiku no Ministru Agrikultura no Peska, Estanislau Aleixo da Silva, aprezenta proposta ba dekretu lei kona-ba Sistema Garantia Kréditu nian ba empreza ki’ik no média sira ne’ebé hetan ona aprovasaun.
Ne’e hanesan prioridade ida ba Governu, tanba hanesan ferramenta ida justisa sosiál nian, maibé mós hanesan komponente fundamentál ida atu forma tesidu emprezariál ida ne’ebé metin no viavel.
Hirak ne’e atu fasilita asesu kréditu ba sosiedade komersiál sira ne’ebé timoroan iha pelumenus porsentu 75 husi partisipasaun sosiál emprezáriu sira nasionál nian no ba emprezáriu individuál sira ne’ebé maka hodi nian naran rasik.
Ho mekanizmu ida ne’e, Estadu fahe risku konsesaun kréditu nian ba banku komersiál sira, to’o valór aas liu porsentu 70 husi empréstimu ne’ebé fó atu kumpre rekizitu legál sira.
Jornalista: Maria Auxiliadora
Editora: Rita Almeida
