DILI, (TATOLI) – Pezidente Konsellu Administrasaun Banku Nasionál Komersiu Timor-Leste (BNCTL, sigla portugés), Brígido de Sousa, hatete fundu dezenvolvimentu ba negosiante hamutuk rihun $500 ne’e bele implementa bainhira parte rua BNCTL no Ministériu Turizmu, Komérsiu no Indústria (MTCI, sigla iha portugés) konkorda ona.
Fundu dezenvolvimentu ba negosiante ne’e apoiu husi Programa Nasaun Unida ba Dezenvolvimentu (PNUD) atu apoia mikro pekena empreza sira.
“Ami halo ona diskusaun ho MTCI, akordu prepara ona, ami haruka ona ba MTCI, mas to’o agora ami seidauk simu fali feedback (komentáriu) husi sira. Kuandu akordu prepara hotu ona, parte rua konkorda ona depois sé maka hakarak mai foti kréditu, hato’o proposta osan ne’ebé tau ona iha banku sai hanesan garantia para funan ne’ebé sira selu ne’e ki’ik liu”, Brígido afirma iha edifísiu BNCTL Timor-Plaza, ohin.
Tanba to’o agora sei iha faze atu finaliza no fila ba parte rua konkorda ona akordu ne’e entaun bele implementa.
“Parte rua ne’e tenke tuur hamutuk sei prepara hotu regulamentu husi banku nian, MTCI nian atubele implementa”, katak.
Antes ne’e Diretór Ezekutivu Servisu Rejistrasaun no Verifikasaun Emprezariál (SERVE), Florêncio Sanches, informa osan rihun $500 ne’e apoiu husi doadór iha rai-li’ur ne’ebé besik tinan rua ona husi parte SERVE, MTCI, Banku Sentrál Timor-Leste asina akordu hamutuk ho PNUD, maibé laiha ida maka asesu.
http://www.tatoli.tl/2018/09/fundu-dezenvovimentu-ba-negosiante-hein-atu-ezekuta-deit/
Jornalista: Maria Auxiliadora
Editora: Rita Almeida
