DILI, (TATOLI) – Atu fó tratamentu di’ak ba pasiente ne’ebé baixa iha sala VIP (Very Important Person) Ospitál Nasionál Guido Valadares (HNGV-sigla portugés), liuhosi Ministériu Saúde iha ona planu atu halo manutensaun ba kondisaun infraestrutura iha tempu besik.
Manutensaun infraestutura no ekipamentu importante, tanba kada pasiente ne’ebé okupa sala VIP loron selu ida $35 ba kofre Estadu.
“Presiza hadi’a duni, tanba ita nia edifísiu hirak ne’e kontrusaun durante okupasaun Indonézia tinan 40 ona, kondisaun komesa lahuk ba dadauk, tanba ne’e ita presiza atu harii duni edifisiu foun”, dehan Vise Ministru Saudé, Bonifácio Maukoli dos Reis, bainhira halo vizita ba HNGV hodi haree diretamente kondisaun infraestrutura no atendementu ba pasiente lokraik ne’e.
Nia dehan tan alende manutensaun ba sala VIP, governu mós hanoin atu halo estensaun ba sala VIP hodi hein prosesu konstrusaun foun ne’ebé Governasaun da-ualu planea ona durante mandatu tinan lima.
“Ita planu atu harii edifísiu foun, tanba ne’e sira ne’ebé aat ne’e ita estende de’it sala rua ka tolu tuir ita nia kapasidade orsamentu”, tenik Governante.
Tuir planu tinan oin, MS sei aloka orsamentu ba konstrusaun edifísiu pediatria (sala ba labarik) iha HNGV.
Mesmu kondisaun infraestrutura bázika no ekipamentu sei sai dezafiu ba médiku sira atu atende pasiente maibé governu apresia ba prestasaun servisu ne’ebe HNGV hatudu liuhosi atendementu moras sira loron-loron ho profesionál.
Durante vizita moras sira, vise ministru ne’e husu nafatin konfiansa pasiente no família pasiente ba enfermeira, doutór sira atu fó tratamentu ba sira nia saúde.
Jornalista: Agapito dos Santos
Editora: Rita Almeida
