DILI, (TATOLI) – Embaixadora Nova Zelándia ba Timor-Leste, Vicki Poole, no reprezentante Ministru Seguransa no reprezentante Polísia Nasionál Timor-Leste (PNTL) hala’o enkontru iha edifísiu Ministériu Defeza no Seguransa, Fatuhada kinta ne’e hodi diskute programa Polísiamentu Komunitáriu.
Vicki haktuir enkontru ne’e sira foka oinsá diskute relatóriu implementasaun Polísiamentu Komunitáriu 2018 nian no progresu sira ne’ebé maka atinje ona iha tinan kotuk, liu-liu haree ba serbisu balun ne’ebe maka sira halo.
Pur-ezemplu, nia dehan Governu Nova Zelándia apoiu ona Governu TL liuhusi PNTL hodi harii uma hamutuk 14 ba Ofisiál Polísia Suku ne’ebé sai hanesan modelu ba Governu atu oinsá kontinua espanda ba suku seluk.
Nia haktuir tan programa ne’e hahú iha Timor dezde 2006 no sei termina iha 2020, ne’ebé fó prioridade oinsá lori komunidade ho polísia bele serbisu hamutuk hodi harii konfiansa.
“Importante maka oinsá atu lori komunidade ho polísia bele serbisu hamutuk hodi harii konfiansa no fiar hosi komunidade ba polísia nomós serbisu hamutuk ho PNTL atu hasa’e kapasidade no koñesimentu iha área Polisiamentu Komunitáriu”, embaixadora ne’e esplika.
Vicki haklaken progresu ne’ebé maka sira atinje iha 2018 maka fó treinamentu ba membru polísia sira, estabelese Konsellu Polisiamentu Komunitáriu hamutuk 244, fó formasaun ba membru Konsellu kona-ba sira nia kna’ar no responsabilidade iha nivel suku liga ho kestaun seguransa no haree mós kona-ba programa sira ne’ebé maka liga ho estudu balun ba evaluasaun nomós dezenvolve polítika ba polísia komunitária.
Entretantu, Reprezentante Komandante Jerál PNTL ne’ebé hanesan mós Xefe Departamentu Polísia Komunitária Nasionál, António da Luz, hateten vantajen hosi enkontru mak integra matéria iha kurríkulu formasaun sira hahú hosi formasaun báziku nomós formasaun avansadu ba membru PNTL.
“Ohin mós ami aprezenta kona-ba integra matéria Polísia Komunitária iha formasaun oin mai liu-liu formasaun pasarevista (check point) ninian, kursu formasaun ofisiál inspetór no oinsá maka enkaixa polísia komunitária iha laran, tanba ofisiál sira ne’e bainhira ramata formasaun sira mós sei koloka ba hanesan Komandante Eskuadra, balun hanesan Komandante Seksaun, entaun sira tenke hatene serbisu Polísia Komunitára iha futuru”, subliña.
Jornalista: Xisto Freitas
Editora: Rita Almeida
