DILI, (TATOLI) – Ministra Finansa (MF) en ezersísiu, Sara Brités Lobo, hatete nia parte oras ne’e servisu hamutuk ho Banku Sentrál Timor-Leste (BSTL) no Timor Gap atu aselera prosesu tranferénsia osan milliaun $650 hodi sosa asaun ConocoPhillips no Shell.
“Progresu di’ak, ida maka oras ne’e aprezenta ona ba parlamentu kona-ba karteira ne’e no segundu servisu hamutuk ho banku sentrál ho Timor Gap para efetua tranferénsia ne’e”, dehan nia ba jornalista sira iha Palásiu Governu, ohin, hafoin aprezenta rezultadu servisu ba Primeiru-Ministru, Taur Matan Ruak.
Banku sentrál maka hanesan jestór operasionál ba fundu petroliféru, tanba ne’e Ministériu Finansa tenke servisu hamutuk ho Banku sentrál ba prosesu transferénsia.
Nia mós aprezenta ba ezekutivu kona-ba rezultadu audénsia ho komisaun C ba konta jerál 2017, tanba ne’e hetan ona orientasaun hosi Primeiru-Ministru atu prepara relatóriu hodi aprezenta ba Parlamentu Nasionál iha semana ne’e.
Jornalista: Agapito dos Santos
Editora: Rita Almeida
