DILI, (TATOLI) – Sekretáriu Estadu ba Formasaun Profisionál no Empregu (SEFOPE), Julião da Silva, hatete sei harii sentru formasaun ne’ebé ho kualidade iha Asosiasaun Nasaun iha Sudeste Aziátika (ASEAN-sigla inglés), nune’e fó kondisaun di’ak ba formadór sira hodi eduka timoroan.
“Primeiru-Ministru husu mai ami atu aprezenta dezeñu ba sentru formasaun ne’ebé di’ak liu iha ASEAN no pasífiku, atu bele fó kondisaun ne’ebé di’ak ba formadór sira hodi hanorin timoroan sira ho kualidade, hanesan mós iha nivél internasionál”, SEPFOPE ba Tatoli hafoin hasoru Xefe Governu, Taur Matan Ruak, iha Palásiu Governu, ohin.
Nia hatutan ekipa tékniku sira hosi SEPFOPE iha tempu badak sei partilla hanoin hotu, depois hahú halo dezeñu ba sentru formasaun.
Hosi programa hirak ne’e maka SEPFOPE ho nia ekipa tékniku sira mai hasoru Xefe Ezekutivu hodi ko’alia oinsá SEPFOPE bele lori programa ba oin.
“Ami aprezenta programa saida maka importante atu SEPFOPE bele halo iha tinan ne’e no tinan oin”, dehan nia.
Nune’e maka ekipa tékniku sira hosi diresaun oioin aprezenta vizaun ba oin, no Primeiru-Ministru rekomenda atu servisu ho didiak, oinsá hadi’a kualidade mão de obra (badaen kualifikadu), atu redús dezempregu iha Timor-Leste.
Entretantu, SEPFOPE sei hadi’a no hasa’e di’ak liután kualidade mão de obra timoroan nian, nune’e bele fasil asesu empregu.
Jornalista: Zezito Silva
Editora: Rita Almeida
