DILI, (TATOLI) – Asesu estudante ho kanál réjime espesiál ba ensinu superiór estatál, Universidade Nasionál Timor-Lorosa’e (UNTL) kontinua sai polémika, nune’e Ministru Ensinu Superiór, Siénsia no Kultura (MESSK), Longuinhos dos Santos, ho Reitór UNTL, Francisco Miguel Martins, aprezenta no esklarese polémika ne’e iha Parlamentu Nasionál (PN), perante deputadu sira.
Ministru Longuinhos dos Santos hateten MESSK rekoñese autonomia kampus maibé hanesan parte governu, buka mós halo ligasaun no koordenasaun liuhusi enkontru semanál, karta ofisiál no seluk tan.
“Ida ne’e hatudu katak iha liña koordenasaun ne’ebé mak di’ak”, subliña Ministru Longuinhos dos Santos perante jornalista sira hafoin aprezentasaun no esklaresimentu iha PN, tersa (26/2).
“Soke desizaun ne’ebé mak foti, hanesan governu tenke superviziona, liliu ba lei no kritériu ne’ebé mak iha. Hanesan UNTL, nia tenke submete ba governu. Agora ministru liuhusi Ministériu Ensinu Superiór, Siénsia no Kultura nunka iha hanoin atu limite timoroan sira ne’ebé mak hakarak asesu ba ensinu superiór públiku”.
Maske nune’e, tuir governante iha ka la’e kondisaun UNTL nian hanesan sala ba aprendizajen, laboratóriu, biblioteka no fasilidade seluk tan. Ida ne’e mak pergunta.
“Entaun, objetivu Oitavu Governu Konstitusionál liuhusi Ministériu Ensinu Superiór, Siénsia no Kultura katak atu haree liu kona-ba kualidade, hadi’a sistema”.
Atu rezolve polémika ne’e, Ministru Longuinhos dos Santos halo analojia katak la iha kadiadu ida, la iha nia xave. La iha problema ida mak la iha nia solusaun. Sempre iha solusaun. “Tanba ne’e preokupa ho ita-nia alin, ita-nia oan sira. Entaun, sempre iha nia solusaun”.
Governante ne’e klarifika atu simu estudante ne’e iha buat rua hanesan lei no regulamentu hatuur ona katak tenke la’o tuir matadalan. Matadalan ne’e kria bazea ba lei baze edukasaun, bazea ba dekretu lei, liliu kona-ba réjime jurídiku ba asesu ensinu superiór nian nomós estatutu UNTL.
“Agora, se kuandu ita dehan simu hotu, kondisaun ne’e mak ita tenke husu, posível ka lae? Ida ne’e tenke haree didi’ak”, afirma tan.
Governante ne’e akresenta: “Ita hadomi ita-nia alin sira, oan sira ne’ebé mak atu asesu iha ensinu superiór públiku nian. Katak, bainhira eskola ne’e garante kualidade, garante atu bele aprende”.
“Se nove mil cento oitenta três, ne’e mak tama hotu UNTL, depois kada fakuldade ida ne’e mil de’it, fakuldade ne’ebé mak atu absolve ho efetivamente ne’e fakuldade edukasaun; ho departamentu barak, 10 ba leten, mas agora sira ne’ebé mak, purzemplu Fakuldade Filozofia ne’ebé mak ho nia departamentu ida de’it, bele absorve”, kestiona.
“Núméru atu absorve ba departamentu ne’e cento ou duzentos, restu ne’e tau iha ne’ebé? Tau ba rai? Rekursu umanu ne’e oinsá”, kestiona tan.
Kona-ba otonomia kampus, Ministru Longuinhos dos Santos afirma haree ba administrasaun no finansa maibé iha desizaun balun lei prevee mós atu bele fó kompeténsia ba governu hanesan MESSK atu foti desizaun.
“Iha ne’ebá, kompeténsia atu determina númeru vagas, fó kompeténsia haree kona-ba vagas estudante sira ne’ebé mak atu tama iha ensinu superiór públiku, liliu UNTL ho IPB (Institutu Politékniku Betano-red). Tenke respeita nesesidade, liliu rekursu umanu nomós fasilidade ne’ebé mak iha”, haktuir.
Iha biban ne’e, Ministru Longuinhos dos Santos mós katak polítika governu atu hadi’a kualidade edukasaun mak hadi’a sistema.
“Tanba UNTL adopta kuríkulu ida; essay test. Ida ne’e quer dizer kuandu hala’o prosesu ida ne’e, iha teória, prátika nomós estudu autonomo. Se nune’e, ita teória tiha tenke prátika. Se prátika, laboratóriu iha ka lae? Se estudu autonomo, estudante atu buka livru ruma, biblioteka iha ka lae? Ida ne’e mak preokupa. Ne’eb’e polítika ensinu superiór nian, atu hadi’a sistema no kualidade”, konklui.
Enkuantu, Reitór UNTL, Francisco Miguel Martins, durante nia deklarasaun iha PN katak UNTL buka atu rezolve polémika ne’e liuhusi reuniaun estraordinária, xefia, Konsellu Jestaun, Reitór, Pró-reitór, Dekanu, Administradór Jerál, Diretór Jerál Nasionál iha 18 fevereiru.
Sorumutu ne’e atu tetu asuntu akadémiku ho rigór no problema sosiál, relasiona ho prosesu simu estudante foun, liuhusi réjime espesiál ka kanál B, haree ona konsekuénsia tomak, tantu interna nomos esterna no sukat ona kbiit liuhusi panorama jerál.
Reitór mós informa dosente ka investigadór nasionál no internasionál, forsa traballu ne’ebé mak atu atende estudante sira, identifika katak 481 mak dosente nasionál sira kompostu husi mestradu no dotoramentu. Profesór kontratadu internasionál sira hamutuk 52. Husi númeru ne’e totál 533.
Númeru sala aprendizajen ne’ebé mak iha UNTL mak kampus sentrál hamutuk 15, kampus ekonomia 10, kampus Edukasaun, Arte no Umanidade iha Liceu 21, Kampus Lahane iha 10, Kampus Enjeñária iha Hera 18, Kampus INFORDEPE 13.
Kampus Kaikoli iha 19, Kampus Medisina iha Kaikoli lima, Kampus Agrikultura Herá 14, Kampus Betano, Same iha 11, totál 629.
Akadémiku ne’e relata UNTL iha ona biblioteka dijitál nomós konvensionál iha Kampus Sentrál rua, Kaikoli Fakuldade Medisina ida, Edukasaun iha ida, Kampus Ekonomia iha rua, Fakuldade Enjeñária iha ida, Balide ba Siénsia Exata nian ida.
Laboratóriu komputadór nian mak iha Kampus Sentrál, ida iha Kampus Fakuldade Siénsia Sosiál-Kaikoli, Kampus Fakuldade Edukasaun, Arte no Umanidade iha rua no Fakuldade enjeñária iha lima inklui mós laboratóriu siénsia nian hanesan ba biolojia, kímika, fízika no matemátika ho mós enjeñária sívil nune’e mós nutrisaun no farmásia.
“UNTL la soi atu haketak oan sira, ne’ebé mai husi família ema boot no ema ki’ik, ema riku no ema ki’ak no la soi atu hili de’it ema boot duke ema ki’ik nia oan haree katak ema ne’ebé serbisu iha posizaun ida difísil ‘entre as paredes e as espadas’”, afirma.
“UNTL prontu atu akomoda númeru ne’ebé mak iha atu evita problema ne’ebé hada’et ba aspetu sosiál sira seluk. UNTL hakruuk ba desizaun polítika husi governu maske réjime espesiál ne’e kabe ba UNTL ninia kompeténsia”.
UNTL fiar katak governu sei tulun UNTL hodi solusiona problema edukasaun nian ne’ebé iha, liliu ensinu superiór nian.
Lee mós notísia ne’e; http://www.tatoli.tl/2019/01/estudante-nain-2-986-aprovadu-tama-un
Jornalista: Rafy Belo
Editora: Rita Almeida
