DILI, (TATOLI) – Prezidente Parlamentu Nasionál, Arão Noe de Jesus, hateten bankada opozisaun hato’o ona rekerimentu ba meza Parlamentu Nasionál atu husu debate kona-ba mudansa investimentu setór petrolíferu.
“Ohin ha’u informa ba Prezidente Repúblika katak iha mós rekerimentu hosi bankada opozisaun para husu debate ho Ministra Finansa, Governadór Banku Sentrál no Timor Gap atu hetan esklaresementu kle’an liu kona-ba ezekusaun polítika kona-ba mudansa investimentu ba setór petrolíferu”, Arão ba jornalista sira iha Palásiu Prezidente Nicolau Lobato, Bairru Pité, kuarta (27/2).
Nia esplika rekerimentu ne’e pertenenti tebes, tanba lori públiku bele kompriende didi’ak mudansa investimentu ba setór petrolíferu ne’ebé sei benefísia povu no nasaun no relata katak debate ne’e sei hala’o iha marsu nia laran.
Arão haktuir Prezidente Repúblika hato’o preokupasaun balun relasaun ba asuntu investimentu ne’ebé liuhusi levantamentu fundu petrolíferu milliaun $650 hodi sosa asaun ConocoPhillips no Shell ninian.
“Xefe Estadu husu Parlamentu Nasionál atu haree didi’ak ninia implementasaun, nune’e bele kumpre baze legál ne’ebé iha para labele mosu defikuldade iha oin”, subliña.
Kona-ba prosesu alterasaun Lei Antividade Petrolífera ne’ebé oras ne’e iha Tribunál Rekursu nia liman, Arão hatán tuir konstituisaun no lei públikasaun aktu sira katak lei ida kuandu públika ona iha Jornál Repúblika tama ona iha vigor, tanba ne’e Governu ka sé de’it tenke ezekuta.
“Kuandu Tribunál deklara inkonstitusionál entaun lei ne’e paradu maibé saida maka implementa ona iha kotuk válidu”, afirma.
Jornalista: Xisto Freitas
Editora: Rita Almeida
