DILI, (TATOLI) – Sekretáriu Estadu Kooperativa (SEKOOP), Arsénio Pereira da Silva, orienta ona nia funsionáriu sira atu hato’o sira-nia progresu serbisu liga ba ezekusaun orsamentu, maibé la’ós lori problema.
Tanba ne’e kada serbisu-na’in hatudu sira-nia dezempeñu serbisu no ida ne’e sai prioridade iha SEKOOP.
“La’ós haree ema ida de’it maka serbisu, maibé seluk tuur de’it ne’e la’e. Ne’e ha’u orienta kedan sira laiha ida mai atu akomoda para tuur de’it”, Arsénio katak iha Bebora, ohin.
Tanba ne’e serbisu saida maka iha no lakontra lei no serbisu ba povu ida ne’e maka importante.
“Ha’u orienta hela de’it diretór jerál, nasionál, xefe departamentu ho funsionáriu sira tenke serbisu depois hetan rezultadu, mai aprezenta nia progresu ne’e. Progresu ne’e hakarak progresu ida ne’ebé iha suratahan leten no verifika ho realidade kampu”, katak.
Ho ida ne’e maka iha funsionáriu balu ne’ebé destaka bá munisípiu, maibé iha ne’ebá ladún iha serbisu entaun haruka filafali mai iha nasionál depois maka destaka fali bá atu halo serbisu no halo monitorizasaun.
Kona-ba orgánika SEKOOP nian ne’ebé aprova ona iha Konsellu Ministru, maibé seidauk promulga maka bainhira hasoru malu ho Primeiru-Ministru foin lalais ne’e, Arsénio hato’o hela asuntu ne’e.
“Eselénsia mós dehan foin ministériu haat maka promulga ona nia orgánika, hein katak fulan ida ne’e Prezidente Repúblika promulga, hanoin ida ne’e mais lejítimu para ita serbisu ho ema sira ne’ebé iha kargu xefia sira ne’e mós fiar án”.
Kona-ba orsamentu Estadu ne’ebé aloka ba SEKOOP iha tinan ne’e hamutuk milliaun $3,7 ba iha kategoria haat mak saláriu no vensimentu, bens no servisu, kapitál menór no transferénsia públika ne’ebé maka ekipa téknika prepara ba ezekusaun iha trimestre dahuluk nian no tuirmai.
“Semana- semana ha’u orienta sira para ida-idak haree nia planu asaun ho nia orsamentu depois prosesu ne’e la’o maka sira mai aprezenta”.
Jornalista: Maria Auxiliadora
Editora: Rita Almeida
