DILI, (TATOLI) – Sekretáriu Estadu Komunikasaun Sosiál (SEKOMS), Merício Juvenal dos Reis Akara, akompañadu husi Diretór Sentru Formasaun Téknika Komunikasaun (CEFTEC-sigla portugés), Embriaun ba Institutu Formasaun Jornalista, Luis Evaristo dos Santos, no Xefe Gabinete SEKOMS, Júlio Gonçalves, halo abertura formasaun dahuluk iha 2019.
Formasaun ne’e iha unidade rua hanesan hakerek imprensa, relasaun públika no protokolu, ho oras 80, hahú segunda (11/3) to’o 16 abril 2019 ba timoroan sira, liliu funsionáriu sira ne’ebé mak serbisu iha área komunikasaun nomós interesadu komunikasaun sira.
“Objetivu mak kapasita funsionáriu husi liña ministeriál hothotu atu sira iha kapasidade, koñesimentu em termos de protokolu, hakerek imprensa i kualidade iha prátika. Hakerek imprensa mós tenke iha kualidade, oinsá halo relasaun públiku ho di’ak, komunika ita-nia sidadaun, ita-nia bainaka no ospitalidade ida di’ak liu”, hateten Merício ba jornalista sira, iha iha Palásiu Governu, segunda (11/3).
Governante ne’e reforsa to’o ona tempu governu hatudu kapasidade atu simu ema, komunika ho sidadaun, bainaka iha rai-laran nomós rai li’ur. Ospitalidade di’ak para povu sente governu simu no komunika ho di’ak. “Ida ne’e mak ha’u-nia deklarasaun forte ba partisipante sira”.
Sekretáriu estadu mós esplika SEKOMS iha DNDI (Diresaun Nasionál Diseminasaun Informasaun) ne’ebé mak iha responsabilidade atu kanaliza, divulga, disemina informasaun atividade governativa nian ba públiku no sidadaun durante ne’e la’o, maske hanoin balun tenke maksimiza informasaun.
“Tanba ne’e mak polítika Oitavu Governu Konstitusionál kada fulan halibur media officer (ofisiál mídia) husi ministériu hothotu para simu orientasaun, atualiza sira-nia serbisu kada fulan mai iha Sekretáriu Estadu Komunikasaun Sosiál hamutuk ho Diresaun Nasionál Diseminasaun Informasaun”.
“Ida mak liuhusi formasaun sira hanesan ne’e (iha CEFTEC-red) para sira iha kapasidade halo serbisu, prepara dokumentu informasaun para depois transmite mai Diresaun Nasionál Diseminasaun Informasaun depois utiliza meius komunikasaun hotu hanesan Ajénsia TATOLI, RTTL, rádiu komunidade para divulga informasaun husi nivel nasionál to’o baze”, esplika.
Governante ne’e akresenta tan polítika governu nian iha tinan ne’e, SEKOMS maksimiza no tau ona mós iha orsamentu para tuun ona ba baze, ne’ebé mak hakarak dezenvolve programa “Penerangan Desa”.
“Kontinua nafatin governu iha komunidade nia leet, governu ko’alia, programa hirak ne’e hotu ita sei mantein para divulga, disemina informasaun ne’ebé mak sidadaun presiza”, akresenta.
Enkuantu, Diretór CEFTEC, Luis Evaristo dos Santos, iha fatin hanesan perante mídia sira afirma asegura kualidade formasaun ne’e rasik mak CEFTEK hetan orientasaun husi SEKOMS atu forma ekipa ida ne’ebé mak reprezenta husi diretór no asesór sira iha ámbitu SEKOMS hodi halo selesaun ba formadór sira ne’ebé mak konkore ba vaga ne’ebé mak loke, durante semana ida ba públiku.
Husi ida ne’e, sira hatama dokumentu. “Ita halo selesaun forte ba iha idaidak nia área, skill (abilidade-red) ne’ebé mak iha, ita hetan formadór rua husi totál formadór 16 ne’ebé mak aplika ba iha unidade rua ne’e ho formadór ne’ebé mak kualidade aas no esperiénsia ba área refere”.
“Tanba ne’e, ekipa ho desizaun koletiva husi painél juri ne’ebé mak hala’o no ami konkorda foti señora Armandina nu’udar formadora ba hakerek imprensa no señór Lariano nu’udar formadór ba relasaun públika no protokolu. Sira na’in rua ne’e iha kualifikasain di’ak, aas no iha koñesimentu di’ak ba iha unidade formasaun rua ne’e”, konklui Diretór CEFTEK, Luis Evaristo dos Santos.
Formasaun sira ne’ebé mak durante ne’e CEFTEC oferese ba timoroan sira, bazeia no kumpre ona padraun INDMO (Institutu Nasionál Dezenvolvimentu Traballu-sigla inglés) nian.
Jornalista: Rafy Belo
Editora: Rita Almeida
