DÍLI, (TATOLI)-Ministériu Ensinu Superiór, Siénsia no Kultura (MESSK) hamutuk ho Konsellu Jeral Universidade Nasionál Timor Lorosa’e (UNTL) sei foti desizaun kona-ba estudante kanál B (rejime espesiál).
“Ohin fó hikas ba UNTL atu bele konvoka reuniaun ho Konsellu Jerál iha UNTL no husi rezultadu enkontru ida ne’e serbisu hamutuk ho MESSK atu bele foti desizaun koletivamente”, informa Ministru Ensinu Superiór, Siésta no Kultura, Longuinhos dos Santos ba jornalista sira, ohin, iha Palásiu Governu, hafoin reuniaun Konsellu Ministru.
Ministru Longuinhos do Santos, klarifika katak, Konsellu Jerál UNTL mak define katak posível atu simu hotu ka lae? Se ida mak posível simu hotu, entaun ministériu prontu atu bele serbisu hamutuk ho UNTL para foti desizaun koletiva.
“Ema hothotu hateten katak ita tenke simu estudante ho dignu. Se dignu ne’e ita tenke simu ita-nia alin sira, ita-nia oan sira mai, sistema aprendizajen ne’ebé asesivel tenke tuur kadeira no meza tenke iha”, Longuinhos dos Santos hateten.
Ho númeru ne’ebé mak boot, sai preokupasaun ba Ministru Longuinhos dos Santos. Maibé, to’o ikus mak Konsellu Jerál UNTL dehan garante fasilidade ho rekursu umanu la problema., maka governu sei halo superviziona.
“Kuandu simu hotu, governu sei tuun fila fali halo inspesaun ida katak loos duni ka lae?”, salienta Ministru Ensinu Superiór, Siénsia no Kultura ne’e.
Ministru ne’e hateten, númeru ne’ebé mak boot atu monta ba iha fakuldade, ba iha departamentu katak tenke di’ak; sala aprendizajen, tuur fatin, meza, bele garante ba ita-nia alin sira atu simu siénsia ho dignu ka lae?.
Reitór UNTL, Francisco Miguel Martins durante nia deklarasaun iha PN, antes ne’e, informa katak UNTL buka atu rezolve polémika ne’e liuhusi reuniaun extraordinária, xefia, Konsellu Jestaun, Reitór, Pró-reitór, Dekanu, Administradór Jerál, Diretór Jerál Nasionál iha loron 18 Fevereiru, tetu ona asuntu akadémiku ho rigór no problema sosiál ne’ebé mak naklekar iha rai laran,
Reitór mós informa katak dosente ka investigadór nasionál no internasionál, forsa traballu ne’ebé mak atu atende estudante sira, identifika katak 481 mak dosente nasionál sira kompostu husi mestradu no dotoramentu. Profesór kontratadu internasionál sira hamutuk na’in 52. Husi númeru ne’e totál 533.
Númeru sala aula ne’ebé mak iha UNTL mak kampus sentrál sala hamutuk 15, kampus ekonomia 10, kampus Edukasaun, Arte no Umanidade, iha Liceu, sala aula hamutuk 21, Kampus Lahane iha sala aula hamutuk 10, Kampus Enjeñária iha Hera ne’e hamutuk 18, Kampus INFORDEPE hamutuk sala aula 13, Kampus Kaikoli iha sala aula 19, Kampus Medisina iha Kaikoli iha sala aula lima, Kampus Agrikultura Herá hamutuk sala aula 14, Kampus Betano, Same iha sala aula 11. “Totál sala aula ne’ebé mak UNTL iha 629”.
Akadémiku ne’e relata, UNTL iha ona biblioteka dijitál nomós haktuir katak UNTL iha biblioteka konvensionál ne’e iha Kampus Sentrál rua, Kaikoli Fakuldade Medisina iha ida, kampus Edukasaun iha ida, Kampus Ekonomia iha rua, Fakuldade Enjeñária iha ida, Balide ba Siénsia Exata nian ida.
Laboratóriu komputador nian mak ida iha Kampus Sentrál, ida iha Kampus Fakuldade Siénsia Sosiál-Kaikoli, Kampus Fakuldade Edukasaun, Arte no Umanidade iha rua no Fakuldade enjeñária iha lima inklui mós laboratóriu siénsia nian hanesan ba biolojia, kímika, fízika no matemátika ho mós enjeñária sívil nune’e mós nutrisaun no farmásia.
“UNTL la soi atu haketak oan sira, ne’ebé mai husi família ema boot no ema ki’ik, ema riku no ema ki’ak no la soi atu hili de’it ema boot duke ema ki’ik nia oan haree katak ema ne’ebé serbisu iha posizaun ida difísil ‘entre as paredes e as espadas”, hateten reitór UNTL.
Nia hatutan, UNTL prontu atu akomoda númeru ne’ebé mak iha atu evita problema ne’ebé hada’et ba aspetu sosiál sira seluk. UNTL hakruuk ba desizaun polítika husi governu maske réjime espesiál ne’e kabe ba UNTL ninia kompeténsia.
UNTL fiar katak governu sei tulun UNTL hodi solusiona problema edukasaun nian ne’ebé iha , liliu ba ensinu superiór nian.
Jornalista: Rafy Belo
Editór: Francisco Simões
