DILI, (TATOLI)-Eskola Internasionál husi Filipina ho naran St. Mary´s Child Dev´t Center, Sábadu (30/3/2019), fó graduasaun ba estudante na’in 44.
Graduandu hirak ne’e, fahe ba nivel rua, mak hanesan nivel pre-primária na’in 34 no primária na´in 10 ba tinan letivu 2019.
Eis-primeira Dama, Isabel Ferreira, ne’ebé partisipa iha graduasaun ne´e hateten katak, Timor-Leste sei iha liña pobreza no atu sai husi liña pobreza ne´e depende sidadaun idak-idak, liuliu família sira atu hola desizaun ida di’ak ba futuru oan sira nian.
“Eskola ne´e importante. Maibé, la´ós de´it haruka oan sira ba eskola hodi hatene lee no hakerek, maibé hatene halo buat ruma ba sira iha família no nasaun, ida ne´e mak importante liu”, afirma Isabel Ferreira, iha Salaun São José, Bebora-Dili.
Nia hatutan, formasaun ba labarik ida sai di´ak liu, independente no halo buat ne´ebé mak di´ak ba sira, ba família ida ne´e importante, kontribuisaun ida boot tebes ba nasaun Timor-Leste.
Nia fó mós votu parabéns ba família timoroan sira ne´ebé mak hili ona eskola St. Mary´s Child Dev´t Center ba sira-nia oan sira hodi estuda, no espera katak, oan sira ne´e sai futuru ba Timor-Leste hanesan nasaun, katak balun bele sai prezidente, primeiru-ministru, profesór, ba família no nasaun.
Iha fatin hanesan, reprezentante Asosiasaun Inan-aman no Manorin na´in sira, Mariano do Carmo hato´o mós profundu gratidaun ba eskola internasionál ne´e tanba ajuda no apoia dezenvolve labarik sira hodi bele hetan graduasaun. Nune´e mós ba esforsu tomak inan-aman nian hodi oan sira bele atinje iha nivel edukasaun ne´e.
“Sira sei iha dalan naruk atu hakat, maibé ita-boot sira (inan-aman) sira-nia serbisu maka´as, esforsu, kontribui ona ba oan sira-nia susesu. Ha´u fiar sira sei sai esperansa ba nasaun, sosiedade no kada família”, hateten Mariano do Carmo.
Mariano do Carmo mós hato´o gratidaun ba governu Timor-Leste tanba apoia ona eskola St. Mary´s Child Dev´t Center no garante permisaun ba ezisténsia eskola internasionál ne´e nian. Tanba tuir Mariano do Carmo katak, edukasaun mak nu´udar xave ba dezenvolvimentu Timor-Leste nian.
Mariano do Carmo hato´o mensajen perante diretór no mós profesór sira husi eskola internasionál ne´e katak, iha ne´ebé no bainhira de´it, hodi fó mós atensaun ba kbiit laek nia oan sira hodi haruka mós oan sira ba eskola sira ne´ebé mak di´ak.
“Simu sira, fasilita sira, ida ne´e buat boot ne´e ita sei halo hamutuk. Serbisu ho karidade ne´e importante tebes ba ita hotu. Favór ba eskola atu fó mós atensaun”, Mariano do Carmo fó sujestaun.
Nia fó obrigadu ba profesór sira hotu tanba hala´o ona kna´ar ida maravilla hodi ajuda nia oan sira no fiar katak, profesór sira nia esforsu sei la monu lerek ba rai, tanba prodús ona futuru ida ba nasaun Timor-Leste.
Jason Jovencio Anasan, adidu Filipina ida reprezenta Embaixadór Filipina iha Timor-Leste akresenta, ho edukasaun ne´ebé estudante sira hetan husi esforsu no dedikasaun profesór sira nian sei halo estudante sira sei sai “valór” iha sira-nia moris, iha vida sosiál no situasaun ekonómika.
“Ita-boot sira (estudante) hakat tan pasu ida iha ita-boot sira-nia moris; pre-primária sei ba primária, primária sei ba ensinu báziku no sei hakbesik daudaun liután ba ema seluk. Hanoin hikas lisaun sira ne´ebé ita-boot sira aprende ona iha eskola, hanoin hikas amizade no belun sira iha perkursu ensinu nian no mós ema sira ne´ebé mak ajuda ona; imi-nia mestre sira,” Adidu Filipino ne´e fó hanoin ba graduadu sira.
Iha biban hanesan, nia mós kongratula estudante no mós inan-aman husi estudante sira ne´e no espera estudante sira ne´e sei sai sidadaun ne´ebé mak produtivu iha Timor-Leste no iha ne’ebé de’it sira horik ba.
Tema graduasaun daruak seluk ne´e mak “Edukasaun Kualidade: Arma Ida Poderoza Bele Muda Mundu”. Partisipa iha serimónia graduasaun ne´e, alende inan-aman, iha mós Ministra Edukasaun, Juventude no Desportu (MEJD), Dulce de Jesus Soares.
Jornalista: Rafy Belo
Editór: Francisco Simões
