DILI, (TATOLI)-Ministériu Edukasaun Juventude no Desportu (MEJD) sei loke vaga serbisu hamutuk 94 ba timoroan tuir méritu hodi sai funsionáriu públiku ba apoiu servisu ministériu nian.
Ministra Dulce de Jesus Soares informa katak, MEJD halo ona diagnóstika no rezultadu iha ona ba diresaun lima hanesan Unidade Nasionál Kurríkulu, Sentru Impresaun, Rekursu Umanu, Diresaun Infrastrutura no Diresaun Nasionál Asaun Eskolár.
“Ami haruka ona karta ba funsaun públika, iha ona resposta ba vaga 94”, nforma Ministra Dulce de Jesus Soares ba jornalista sira, horiseik loro-kraik, iha salaun INFORDEPE (Institutu Nasionál Formasaun Dosente no Formasaun Profisionál Edukasaun-sigla portugés), Balide-Dili.
“Iha tempu badak, Ministériu Edukasaun loke konkursu por mérito, atu nune’e ba ema ne’ebé iha interese, sira bele mai aplika atu sai funsionáriu iha Ministériu Edukasaun ho sira-nia estatutu hanesan ajente administrasaun públika”, Ministra Dulce de Jesus Soares hatutan.
Notísia relevante; http://www.tatoli.tl/2019/01/funsionariu-273-hosi-mejd-halo-protesta-tanba-la-kontinua-kontrata/
http://www.tatoli.tl/2019/02/reprezentante-funsionariu-kazual-mejd-272-hasoru-pm/
Jornalista: Rafy Belo
Editór: Francisco Simões
