INGLATERRA, (TATOLI) – Mate isin Helder Manuel Pires Piedade nu’udar membru organizasaun Rezisténsia Nasionál Estudante Timor-Leste (RENETIL) sei to’o Timor iha sábadu, (13/4) hosi Inglaterra.
Prezidente komunidade Timor iha sidade Winsford (9 miles hosi Crewe), Rui Pires, haktuir mate isin sei sai hosi Londres iha loron (11/4) no aban, (12/4) to’o Bali tuku 7.00 oras Indonézia nian. Hosi Bali ba Timor iha loron sábadu (13/4).
Hanesan responsavel hakarak hato’o obrigado ba komunidade sira hotu iha Reinu Unidu hosi Peterborough, Oxford, Bridgwater, Crewe, Northwich ho Winsford, Irlanda, Bristol no fatin seluk tan inklui maun azilu polítiku sira ne’ebé ajuda tau osan hamutuk hodi lori mate isin fila ba rai Timor.
Porfirio da Costa ne’ebé reprezenta grupu azilu polítiku iha ninia diskursu hateten: “Hodi grupu azilu polítiku fó obrigadu ba komunidade hotu iha UK (Reinu Unidu) ne’ebé hatudu solidariedade forte ba maluk matebian Helder Pires”.
Nia hatutan: “Husu atu espíritu solidáriu ida ne’e la hotu iha ne’e i kontinua nafatin ba jerasaun foun sira iha Reinu Unidu.
Diplomata Gilson Ramos hosi embaixada RDTL iha Londres mós hatutan lia-fuan agradesimentu ba solidariedade.
“Hanesan Timoroan valoriza nafatin valór patriotizmu ne’ebé saudozu Helder Pires halo durante ninia tempu klosan iha tempo funu ba liberta rai Timor. Hanesan membru RENETIL hakarak fó obrigadu ba maluk sira hotu ne’ebé fó solidariedade ba ita nia saudozu Helder Pires”.
Helder Manuel Pires Piedade nu’udar membru RENETIL hosi Unidade Estratéjika Rezisténsia (UNER) Kalohan/Yogyakarta no kaer Departamentu Análize no Investigasaun Polítika ho naran funu Foho Rai Boot.
Saudozu sempre bolu ho naran Rai Boot halo parte iha grupu azilu polítiku 29 ne’ebé tama iha embaixada Amérika iha Jakarta iha loron 12 fulan-novembru 1994. Tempu ne’ebá Indonézia sai uma na’in ba enkontru nivel altu Kooperasaun Ekonómika Ázia-Pasifika (APEC-sigla inglés) ne’ebé marka mós prezensa eis-Prezidente Amérika, Bill Clinton.
Helder Pires moris iha Dili, loron 21 fulan juñu 1968. Matebian husik iis iha Leighton hospital Crewe, loron 23 fulan liubá ho tinan 51, tanba sofre moras ne’ebé komplikadu.
Membru família, komunidade no azilu polítiku sira no reprezentante embaixadór Timor-Leste iha Londres, Gilson Ramos, partisipa misa hamutuk ba omenajen ikus ba saudozu ne’ebé halo iha Igreja Catholic St Mary Church, Gatefield Street, Crewe.CW1 2JP, iha tersa (9/4) tuku 11.00. Depois misa kontinua kedas agradesimentu iha salaun Crosvile Social Pub Crewe.
Oras ne’e daudaun Timoroan lubun maka moris no servisu iha sidade Crewe. Inan aman sira servisu loron kalan, maibé oan sira eskola ba futuru ne’ebé di’ak liu.
Kontribuinte: Celso Oliveira
Editora: Rita Almeida
