LIKISÁ, (TATOLI) – Alokasaun Orsamentu Jerál Estadu (OJE) 2019 ba implementasaun Planu Nasionál Dezenvolvimentu Suku (PNDS) iha munisípiu Likisá ne’e orsamentu operasionál nian de’it, tanba ne’e sei iha identifikasaun planu hodi implementa PNDS.
“Orsamentu operasionál ita hatene katak sei halo hela, estabelese ekipa jestaun nivel suku nian, sira sei halo preparasaun téknika, enkontru para informa kona-ba planu ne”e. Depois sei identifika prioridade katak atu halo saida”, informa Sekretáriu Munisípiu Likisá, Renato Moniz Serrão, ba TATOLI iha suku Vatuboro, postu administrativu Maubara, segunda (22/4).
Sekretáriu ne’e fó razaun katak identifikasaun planu sira ne’e tanba planu dezenvolvimentu suku ne´e iha indikadór. “Ne´e tenke liuhusi soru-mutu ho komunidade. Ne’e la’ós governu mak deside maibé komunidade mak deside”.
“Tanba ne’e mak PNDS ne´e sei Orsamentu Operasionál ne’e, ita reúne komponente hothotu atu diskute kona-ba implementasaun projetu PNDS ne’e”, konklui Renato Moniz Serrão.
OJE 2019 ne’ebé alokadu ba munisípiu Likisá ba programa PNDS iha administrasaun munisipál hamutuk rihun $537,030.
Husi totál ne’e kustu operasionál hamutuk $113,305 hodi halo preparativu ba atividade tinan tuir mai ba suku 23 no aloka ba atividade fízika hamutuk $423,725 ba suku 20.
Jornalista: Rafy Belo
Editora: Rita Almeida
