DILI, 06 maiu 2019 (TATOLI) – Ministru Justisa, Manuel Cárceres informa katak iha tempu badak, parte ministériu sei monta plaka iha área besik tasi ibun, husi Comoro to’o Cristo Rei.
“Lakleur tan Ministériu Justisa sei haruka tau plaka iha tasi ibun sira katak tasi ibun ne’e Rai Estadu nian. Husi tasi ibun to’o metru 50 ne’e, tuir lei rai estadu nian,” hateten Ministru Manuel Cárceres ba jornalista sira iha Palásiu Governu, segunda (06/05).
Governante ne’e mós dehan, bainhira iha ema ruma okupa Rai Estadu iha área besik tasi ibun tenke regulariza ho Ministériu Justisa (MJ). Tanba ne’e regra, sira tenke kumpre.
“Fulan tolu nia laran, ita-nia maluk sira ne’ebé aluga rai estadu no uma estadu manan konsiénsia, kumpre lei no sira hatama osan barak ona ba kofre estadu. Hein katak sira kumpre nafatin situasaun sira ne’e,” dehan tan ministru.
Governante ne’e akresenta plaka ne’e sei tau iha Comoro to’o Cristo Rei. Katak, rai ne’e estadu nian no halo uma iha ne’e tenke husu autorizasaun. “Ne’e hanesan avizu, kuandu to’o tempu atu halo asaun sira tenke hatene katak simu ona avizu”.
Hodi reforsa: “Kuandu ita tau ona plaka signifika iha lei mak regula, tanba ne’e tenke kumpre lei. Ita labele duni ema arbiru de’it, ita sei fó dalan ba nia tuir lei mas kuandu la tuir lei iha dalan seluk atu regula”.
Ministru Manuel Cárceres dehan tan, plaka ne’e orsida loraik (ohin, 06/05) sei iha reuniaun no nia rasik sei asina despaxu atu komesa tau.
Nune’e mós la’ós tasi ibun de’it maibé iha mota ninin mós sei tau plaka hotu, katak ne’e fatin perigozu. “Selae bainhira mota mai lori uma dehan estadu mak la tau matan”.
Jornalista : Julia Chatarina
Editór : Rafy Belo
