MANATUTU, 11 maiu 2019 (TATOLI)-Universidade Nasionál Timor Lorosa’e (UNTL), Fakuldade Enjeñaria, Siénsia no Teknolojia (FEST) “introdús” mákina moderna ho sistema modernu kona-ba produsaun tua sabu ho métodu tradisionál ba modernu hodi minimiza komunidade tesi ai, iha Suku Orlalan, Batara, Postu Administrativu Laklubar, Munisípiu Manatutu.
Peskizadór prinsipál, Profesór Domingos de Sousa Freitas, iha edifísiu Postu-administrativu Laklubar (09/05) hateten, ho métodu tradisionál, produtór tua sabu sira bele hetan moras respiratóriu, mear, no inus been. Tanba ne’e, liuhusi opsaun téknika maka peskizadór sira konsege kria fali mákina ida ne’ebé aplika métodu modernu no bele salvaguarda mós komunidade nia saúde.
“Ho mákina ne’ebé ita dezeña bele solusiona aspetu hirak ne’ebé redús impaktu ambientál ka la tesi ona ai, diminui tempu oras ida to’o oras haat, hadook komunidade husi moras, no hasa’e rendimentu ekonómika,” hateten peskizadór ne’e, refere komunikadu mídia UNTL ba TATOLI, sábadu (11/05).
Peskizadór ne’e konfirma katak peskiza ne’e hala’o tanba bazea ba realidade moris komunidade ne’ebé hola parte ba suku Orlalan, Batara no Manelima.
“Ohin ami mai aprezenta rezultadu peskiza ne’ebé hala’o ona iha 2018 liubá, ne’ebé hatudu katak komunidade ho porsentu 85 ne’e transforma sira-nia tua-metan ba tua sabu ho uzu métodu tradisionál ne’ebé tenke sunu ai barak, hasai ahi suar barak no gasta tempu kle’ur liu to’o oras 7 to’o 12, labele halo serbisu seluk. Nune’e, ami haree katak ladún efetivu,” hateten akadémiku ne’e.
Enkuantu, Ageu da Costa nu’udar estudante finalista ida hateten, nia parte envolve iha peskiza ne’e hodi kompleta nia peskiza, iha ámbitu hakerek sientífiku liuliu ba monografia. “Esperiénsia ne’ebé hetan maka bele hatene métodu tradisionál ne’ebé iha deferénsia ho métodu modernu nian; hatudu mudansa boot iha grau, utilizasaun, tempu no kustu,” kompara estudante ne’e.
Iha fatin hanesan, partisipante Olinda Pereira demonstra nia sentimentu orgullu relasiona ho rezultadu peskiza ne’ebé realiza husi akadémiku UNTL sira tanba konsidera bele fó solusaun di’ak no moderna ba komunidade iha lokál ne’ebé maioria moris ho ko’a tua.
“Ami presiza atu promove liután rezultadu peskiza ba komunidade hirak ne’ebé ekonomikamente dependénsia ba ko’a tua, no mós promove ba governu hodi dezenvolve ka kria kooperativu ruma,” akresenta atuál xefe Suku Funar ne’e.
Komparasaun entre alkol ne’ebé prodús husi modelu tradisionál ho porsentu 43, embora mákina ne’ebé peskizadór mekánika sira prodús bele atinje alkol porsentu 73, no mós bele garante kualidade no ijiéniku.
Iha mini-konferénsia ne’ebé realiza iha fatin refere, Profesór Domingos de Sousa aprezenta rezultadu peskiza ne’ebé uza amostra tua-metan ho métodu modernu ba tua sabu, no Profesór Victos da Costa Soares aprezenta kona-ba uza amostra tua-mutin ho métodu modernu ba tua sabu.
Eventu ne’e partisipa husi Profesór Ryuichi Fukuhara, Koordenadór ba Projetu Peskiza husi Japaun ba ASEAN (Organizasaun Sudeste Aziátiku), no mós Profesór Doutór Andrey Damalelo. Inklui, partisipasa husi reprezentante Administradór Postu-Administrativu Laklubar nian, Fernando Valentino, xefe suku no komunidade no bainaka espesiál sira seluk.
Edisaun: Rafy Belo
