DILI, 13 maiu 2019 (TATOLI) – Diretór Klínika Ospitál Nasionál Guido Valadares (ONGV), Flavio Brandão, hateten estoke ran daudaun ne’e iha ONGV sufisiente.
“Ami nia pesoál sira esforsu maka’as no sempre buka meius atu buka ran, maibé en termu doasaun, konsiénsia sidadaun nian hodi doasaun ran maka menus”, hateten Flavio Brandão ba TATOLI iha salaun Otél Novo Turizmu, ohin.
Flavio hatutan konsiénsia sidadaun halo doasaun ran sei menus, nune’e afeta tebes ba estoke ran iha ONGV.
Maibé pesoál saúde sira buka alternativa oi-oin hodi buka ran, nune’e bele hatán ba pasiente sira ne’ebé presiza.
Husu kona ba tipu ran saida maka sempre menus, Flavio Brandão dehan tipu ran sira ne’e akontese situsionál de’it, no la permanente.
“Ha’u susar atu hatene númeru estoke ran ne’ebé maka daudaun ne’e iha ospitál, tanba sempre muda”, katak.
Jornalista: Antónia Gusmão
Editora: Rita Almeida
