DILI, 14 maiu 2019 (TATOLI) – Estadu Nova Zelándia liuhosi ninia embaixadór foun, Philip Hewit, ohin entrega karta kredensiál ba Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, hodi reforsa apoiu ba Timor-Leste.
Diretór Jerál Asuntu Bilaterál Ministériu Negosiu Estranjeiru no Kooperasaun (MNEK), Isílio Coelho, hateten embaixadór kontente tanba Timor-Leste iha mekanismu Bilateral Police Development.
“Embaxador Philip kontente teb-tebes, tanba Timór-Leste mós iha mekanismu ida ita bolu Bilateral Police Development ne’ebé halo tinan-tinan, entaun área sira ne’e nafatin sai prioritaria ba rai rua ne’e nian. Deseju ita ni’an maka hakarak mantein iha área sira ne’e, tanba prioridade ita koopera mós ita nia parseiru sira iha área espesifika”, dehan nia ba jornalista sira hafoin asiste serimonia entrega karta kredensiál.
Tuir Diretór Jerál durante kooperasaun, progresu barak; liuliu área edukasaun, no iha área turizmu tempu badak delegasaun husi Timór sei ba tuir formasaun iha Nova Zelándia.
“Iha enkontru ne’e Xefe Estadu hato’o bemvindu ba embaxador foun, no agradese ba relasaun bilaterál ne’ebé Nova Zelándia iha to’o ohin loron no re-itera mós Timór-Leste nia deseju para mantein no reforsa liu tan relasaun bilaterál no mós kooperasaun”, katak.
Durante sorumutu, na’in rua mós ko’alia uitoan kona-ba área prioritaria ne’ebé maka Timór-Leste ho Nova Zelándia koopera to’o agora, li-liu iha edukasaun, turizmu no justisa. Haree oinsá maka kooperasaun ne’e reforsa liu tan iha futuru.
Philip Hewit troka embaixadór tuan, Vicki Poope, ne’ebé termina ona ninia knaar iha abríl fulan kotuk. Hewit sei hala’o nia knaar durante tinan tolu.
Serimonia entrega kredensiál ne’e akompaña mós husi Ministru Negosiu Estranjeiru no Kooperasaun (MNEK), Dionísio da Costa Babo.
Philip Hewit inisia nia kareira iha Ministériu Negosiu Estranjeiru Nova Zelándia iha 2001. Philip Hewit asume kargu Primeiru Sekretáriu iha Samoa, Konselleru Dezenvolvimentu iha Bangkok, iha Tuvalu no Nieue ba Polítika Rejionál Pasífiku.
Iha tinan 2018, Philip Hewit vizita Timor-Leste nu’udar responsável programa parseria ho Timor-Leste.
Jornalista: Antónia Gusmão
Editora: Rita Almeida
