MANATUTU, 20 maiu 2019 (TATOLI) – Ministru Justisa (MJ), Manuel Cárceres, kontente tanba bele hetan fiar husi Governu da-ualu hodi prezide serimonia isar bandeira iha Manatutu ne’ebé hanesan rain moris fatin.
“Haksolok tebes tanba Manatutu oan mai prezide serimonia isar bandeira iha ha’u nia rain rasik, no mós lee mensajen furak husi Prezidente Repúblika nian ba ha’u nia maluk Manatutu oan sira, mensajen hosi Estadu ne’e motiva tebes povu Timor-Leste, liuliu povu Manatutu rasik”, hateten Manuel Cárceres hafoin prezide serimonia isar bandeira iha munisípiu Manatutu, ohin.
Governante ne’ebé nu’udar Manatutu oan ne’e afirma, Manatutu oan respeita malu, tan ne’e partisipasaun komunidade nian iha seremonia isar bandeira ba loron restaurasaun independensia ba-dala 17 iha 20 maiu 2019 barak tebes.
“Ami Manatutu oan hatene respeita malu, sa tan sira nia maluk Manatutu oan mak mai tan prezide seremonia ne’e. Maske ha’u haree iha fatin seremonia ladún, maibé iha liur barak tanba atu asesu ba fatin seremonia mós limitadu, nune’e sira hamrik de’it iha liur”, katak.
Aleinde ne’e, administradór munisípiu Manatutu, Fernando Sousa Junior, reforsa partisipasaun komunidade másimu tebes, tanba komunidade konsidera loron 20 maiu nu’udar loron istóriku ba Timóroan hotu.
“Ha’u nu’udar aman ba munisípiu Manatutu sente kontente tebes, tanba partisipasaun komunidade nian másimu, ida tan maka inspetór ba seremonia mai hosi ami Manatutu oan rasik”, dehan Fernando.
Serimonia ne’e mós Governu liuhosi Ministériu Justisa entrega sertifikadu apresiasaun ba grupu isar bandeira sira.
Ministru Cárceres lee diskursu Prezidente Repúblika, Francisco Guterres Lú Olo. Entretantu, seremonia ne’e hetan seguransa hosi Polísia Nasionál Timór-Leste (PNTL), munisípiu Manatutu.
Jornalista: Antónia Gusmão
Editora: Rita Almeida
