LOIDAHAR, 20 maiu 2019 (TATOLI)—Veteranu-sira iha Munisípiu Liquiçá husu Estadu atu halo balansu entre subsídiu veteranu ho pensaun vitalísia ba eis titulár sira.
“Buat ne’e ladi’ak ba veteranu sira, liliu veteranu-sira ne’ebé halo funu durante tinan 24. Ita kompara ho eis titulár ida, veteranu nia dignidade tún fali no dignidade eis titulár sa’e liu,” Veteranu Silvestre Martins alias Loe Coli ‘BKL’ ba Agência TATOLI iha Suku Loidahar, Postu Administrativu Liquiçá Vila, bainhira partisipa iha komemorasaun Restaurasaun Independénsia Timor-Leste ba dala 17, segunda (20/5/2019).
Nia dehan, parte dezenvolvimentu la’o di’ak hotu ona, maibé seidauk dignifika didiak veteranu-sira. “Ha’u lahatene bainhira mak dignifika. Halo diferensa entre veteranu ho eis titulár, tanba veteranu nia luta durante tinan 24, maibé kompara ho eis titulár ida kontribui Estadu tinan 5 de’it maibé nia hetan $2000,00/fulan, maibé veteranu hetan de’it $600,00 itál/fulan,” Silvestre realsa.
Silvestre afirma, se veteranu ida iha oan 7, atu selu osan eskola uza subsídiu ne’e la to’o.
Iha fatin hanesan, veteranu no atuál Koordenadór FRETILIN Postu Liquiça Vila, Joaquim Barros Soares, haktuir kontituisaun artigu 11 hateten Estadu tenke rekoñese no valoriza sidadaun hotu-hotu ne’ebé partisipa iha luta ba libertasaun nasionál.
“Lei ida ne’e mak fó omenájen, fó kondekorasaun no rekoñese veteranu sira nia luta. Tanba ne’e, Estadu tenke dignifika didi’ak veteranu sira,” tenik eis deputadu FRETILIN iha lejizlatura dahuluk ne’e.
Jornalista: Evaristo Soares Martins
Editór: Xisto Freitas
