MANUFAHI, 20 maiu 2019 (TATOLI) – Sekretáriu Estadu Juventude no Desportu, Nélio Isaac Sarmento, husu ba sidadaun hotu, liuliu joven sira tenke sivilizadu atu respeita lei no orden hodi mantein pás no mós estabilidade.
“Jerasaun foun atu halo ona ezame konsénsia katak Nasaun ne’e la’o ba oin, tanba ne’e tenke prepara án”, apela governante ne’e iha ámbitu selebrasaun loron restaurasaun independensia ba dala 17 iha Manufahi, ohin.
Nia afirma, joven tenke kuda kultura dame malu hodi hadok án hosi konflitu no krime sira, nune’e kontribui pás no estabilidade.
Nia dehan iha planu Orsamentu Jerál Estadu 2020, sei tau mós planu kapasitasaun ba joven sira, loiuliu formasaun mudansa ba mentalidade hodi kria empregu ba ninia án rasik.
“Ita sei kria kondisaun balun para joven kria empregu ba ninia án rasik”, akresenta.
Jornalista: Egas Cristovão
Editora: Rita Almeida
