DILI, 23 maiu 2019 (TATOLI)-Ministru Justisa, Manuel Cárceres da Costa, hateten, sidadaun Timor-Leste hotu iha diretu atu rejistu hodi hetan sertidaun RDTL no Billete Identidade (BI) hosi estadu.
Ministru Manuel Cárceres da Costa dehan, ba futuru servisu Diresaun Nasionál Rejistu no Notariadu (DNRN-sigla portugés) sei fornese dokumentu hirak nee liuhosi atendimentu movel too area remotas hodi halo rejistu hahú hosi labarik hosi tinan 0-5,ema ho defisiénsia no seluk tan.
“Ita nia inan-aman, maluk defisiénsia sira seidauk rejistu karik, ita arranja ekipamentu tau iha karreta movel hodi ba rejistu movel ba sidadaun, atu nune’e, sira bele hetan ona sira nia diretu,” hateten Ministru Manuel Cárceres da Costa, ohin, hafoin simu apoiu karreta Toyota Hilux ida hosi governu no povu Japaun iha Edifísiu DNRN, Bebora Dili.
Atu kompleta kondisaun serbisu hodi fó atendimentu iha tinan oin, Ministru Justisa sei propoin orsamentu atu sosa mákina imprimisaun dokumentu no seluk tan.
“Ita rejistu hotu iha terrenu, ita imprime kedas hodi entrega kedas ba ita ninia sidadaun hodi evita burokrasia naruk,” hateten Ministru Manuel Cárceres da Costa.
Jornalista : Agapito dos Santos
Editór : Francisco Simões
