iklan

NASIONÁL, DESPORTU, DILI, ERMERA, MANATUTO, MUNISÍPIU

Estádiu Manatuto-Dili Paradu, Gleno La'o Di’ak

Estádiu Manatuto-Dili Paradu, Gleno La'o Di’ak

Futuru projetu kostrusaun Estádiu Manatuto ho naran “Kay Rala Xanana Gusmão” ne’ebé implementa hosi Kompañia Obrai Unipesoal Lda, paradu. Imajen Tatoli/Eugénio Pereira

DILI, 29 maiu 2019 (TATOLI)—Governu liuhusi Sekretaria Estadu Juventude Desportu (SEJD) lamenta konstrusaun projetu Estádiu Futeból Manatuto no Dili ne’ebé la’o paradu, maibé Estádiu Ermera mak hatudu iha progresu di’ak no furak loos.

Futuru projetu konstrusaun Estádiu Manatuto ho naran “Kay Rala Xanana Gusmão” ne’e implementa hosi Kompañia Obrai Unipesoal Lda ho valór orsamentu tokon $2 no governu selu ona pursentu 60). Nune’e mós Estádiu Munisipál Dili kaer hosi Kompañia Marino Interprise Lda tokon $1,5 no  governu selu ona to’o pursentu 70  no Estádiu Gleno implementa hosi Kompañia SMS atinje ona pursentu 90.

“Ita-nia Estádiu Manatuto iha problema ne’ebé komplikadu uituan. Ha’u hein hela atu aprezenta ba Konsellu Administrasaun Fundu Infraestrutra (KAFI) mak sei foti desizaun, tanba kompañia la prontu atu kontinua konstrusaun,” dehan Nélio Isaac Sarmento ba jornalista iha Palásiu Governu, Dili, ohin.

Nélio dehan, bazeia ba informasaun ne’ebé ekipa SEJD simu katak Diretór Kompañia Obrai Unipesoal Lda, Luis Oliveira sai tiha ona hodi troka diretór foun, hafoin projetu paradu.

Ho projetu ne’ebé la’o paradu, ekipa SEJD mós halo ona relatóriu téknika ba Komisaun Nasionál Aprovizionamentu (CNA-sigla portugés) no Ajénsia Dezenvolvimentu Nasionál (AND) seidauk barani atu foti desizaun ba kompañia no sei entrega ba Konsellu Administrasaun Fundu Infraestrutura (KAFI) mak sei foti desizaun.

Nélio hatutan, tuir kontratu, bainhira kompañia ida halo obra Estadu la ramata, sei selu multa ba Estadu tuir lei ne’ebé KAFI mak iha kompeténsia atu haree kestaun ne’e.

“KAFI mak sei desidi kazu ne’e. Agora ami hein hela bainhira mak KAFI halo ajenda depois hodi ami ba esplika,” nia hateten.

Eis jornalista TVTL ne’e hatutan, konstrusaun Estádiu Munisipál Dili mós la’o paradu no Kompañia Marino fó razaun ba governu katak impase polítika afeta ba sira-nia kapasidade orsamentu, tanba ne’e projetu sei para hodi hein orsamentu iha foin kompañia kontinua hadi’a.

“Kompañia koopera para atu hadi’a, tanba sira hein pagamentu adisionál para halo ramata projetu ne’e,” nia katak.

Ekipa SEJD mós ho tékniku ADN halo ona inspesaun ba projetu fiziku Estádiu Dili no hein SEJD halo estensaun ba kontratu hodi haruka ba ADN hodi haree prosesu halo ramata konstrusaun.

Entretantu, Estádiu Munisípiu Gleno-Ermera Kompañia SMS halo atinje ona pursentu 90 ne’ebé kompañia sei koopera hodi halo ramata no entrega ba governu.

“Estádiu Ermera nian furak loos. Hein fulan juñu ka jullu kompañia entrega para governu inaugura ona hodi utiliza atividade jogu iha rai laran,” nia tenik.

Nia dehan, Estádiu Ermera rasik sei uza ba eventu jogu internasionál, tanba klima iha Gleno rai malirin halo dút moris matak loos.

Jornalista : Eugénio Pereira

Editór: Xisto Freitas

iklan
iklan

Leave a Reply

iklan
error: Content is protected !!