DILI, 05 juñu 2019 (TATOLI) – Prezidente Komisaun Funsaun Públika, Faustino Cardoso hasoru malu ho Primeiru-Ministru, Taur Matan Ruak hodi informa kona-ba relatóriu anuál no atividade ne’ebé sei hala’o iha komemorasaun loron nasionál Funsaun Públika iha loron 15 jullu.
“Ohin Komisaun Funsaun Públika (CFP-sigla portugés) mai hato’o relatóriu anuál 2018 nia ba Primeiru-Ministru no atualiza atividade sira ne’ebé la’o hela to’o ohin loron,” tenik Faustino ba jornalista sira iha Palásiu Governu, kuarta ne’e.
Hodi dehan, foin dadauk liu-hosi ekipa avansada halo jornada onah Turiskai to’o Laklubar, atu identifika fatin ida iha inísiu fulan jullu sei envolve funsionáriu barak hodi la’o jornada, ho objektivu atu fó biban ba sira kona-ba situasaun ne’ebé povu sira enfrenta hela no tempu hanesan bele banati tuir espíritu no prinsípiu sira ne’ebé eroi sira husik hela.
La haluha mós nia atualiza kona-ba preparativu komisaun ba distinsaun no prémiu ba funsionáriu sira ne’ebé mak hatudu dezempeñu di’ak, nune’e mós Koa’lia kona-ba kestaun oinsá atu iha funsaun públika ne’ebé profesionál.
Faustino akresenta, Enkontru ohin nia atualiza mós kona-ba nomeasaun sira ne’ebé oras ne’e halo hela.
“To’o ohin loron estrutura orgánika ministériu sira maioria promulga ona husi Prezidénte Repúblika, entaun kabe ba ministériu ida-idak atu oinsá halo nomeasaun bazeia ba estrutura orgánika VIII Governu tuir ministériu ida-idak ninian,” katak líder másimu CFP ne’e.
Biban hanesan, nia mós atualiza ba Xefe Governu kona-ba preparativu ba promosaun funsionáriu públiku sira, ne’ebé sei hala’o hafoin realizasaun seremónia loron nasionál ba Funsaun Públika iha loron 15 jullu.
Jornalista: Julia Chatarina
Editór: Rafy Belo
