DILI, 07 juñu 2019 (TATOLI) – Prezidente Autoridade Rejiaun Administrativa Espesiál Oe-cusse Ambeno (RAEOA) no Zona Espesiál Ekonomia Sosiál Merkadu (ZEESM), Marí Alkatiri admite nia mandatu sei ramata iha 30 jullu, maske nune’e nia lakohi halo espekulasaun.
“Ha’u husik se mak atu deside, deside, tanba ha’u laiha inisiativa. Ha’u hatene ha’u-nia mandatu sei ramata iha 30 jullu. Ha’u hatene, Primeiru-Ministru hatene no Prezidente Repúblika mós hatene,” informa Prezidente RAEOA- ZEESM ba jornalista sira iha Palásiu Governu, sesta ne’e.
Hodi hatutan: “Ha’u lakohi ko’alia tanba ha’u la buka moris iha Oe-cusse”.
Alkatiri simu pose iha loron 30 jullu 2014 no bainhira besik nia mandatu ramata seidauk hatene Governu sentrál sei renova nia mandatu ka iha ona figura foun atu troka.
Antes mandatu ramata, Prezidente Autoridade RAEOA lansa Planu Estratéjiku Rejionál ba tinan 2019 to’o 2023 ho pájina 200 resin.
Planu estratéjiku Rejionál ne’e formula bazeia ba rezultadu konsultasaun públiku ho komunidade suku 18 ho mós autoridade lokál, juventude no entidade oioin iha Oe-Cusse.
Refere ba Lei nú 3/2014 de 18 de Junho, kria ona Rejiaun Administrativa Espesiál Oé-Cusse Ambeno no harii Zona Espesiál Ekonomia Sosiál Merkadu iha Oé-Cusse no Ambeno ne’ebé aprova iha Parlamentu Nasionál no Promulga ona husi Prezidente Repúblika.
Prezidente Autoridade hala’o servisu hamutuk ho instituisaun sira seluk atu harii Zona Espesiál Ekonomia Sosiál Merkadu iha Timor-Leste ho Projetu Pilotu iha Oé-Cusse no Ambeno.
Jornalista : Julia Chatarina
Editór : Rafy Belo
