DILI, 10 juñu 2019 (TATOLI) – Primeiru-Ministru (PM), Taur Matan Ruak konvoka reuniaun ho Administradór na’in 12, Prezidente Autoridade haat no Administradór Munisípiu na’in ualu, hodi ko’alia kona-ba preparasaun Orsamentu Jerál Estadu (OJE) tinan 2020 hodi bele aprezenta iha jornada orsamentál.
Vise-Ministru Administrasaun Estatál, Abílio José Caetano hateten katak objetivu prinsipál husi enkontru refere, Xefe Governu hakarak hato’o orientasaun ba Administradór sira oinsá prepara orsamentu ba tinan oin nian.
“Hafoin retiru iha 29 maiu, VIII Governu identifika ona prioridade ba 2020. Entaun atu atinje prioridade ne’e, com certeza la’ós de’it ministériu sira mak kontribui maibé munisípiu sira mós tenke kontribui. Tanba ne’e mak ohin Primeiru-Ministru hato’o liña orientadora, oinsá mak aloka orsamentu liga ho prioridade 2020 nian,” tenik Vise-ministru Abílio José Caetano ba jornalista sira iha Edifísiu Ministériu Administrasaun Estatál (MAE), Colmera, segunda ne’e.
Orsamentu 2020 Prioritiza Agrikultura, Saúde, Edukasaun
Nia haktuir, alokasaun orsamentu tinan 2019 ladún tau prioridade ba nesesidade bázika povu nian, tanba ne’e PM husu alokasaun orsamentu tinan 2020 tenke tau prioridade ba setór agrikultura, saúde no edukasaun.
“Ida ne’e mak hanesan prioridade, ne’ebé mak iha relasaun direta ba nesesidade bázika ba povu nia moris loron-loron,” katak governante ne’e.
Orsamentu ba kada munisípiu sei la hanesan tanba depende ba populasaun no ba planu ho nesesidade munisípiu ida.
“Sira mós iha nia planu munisipál no iha nesesidade, ne’ebé haree ba moris loron-loron nia, tanba ne’e mak alokasaun la hanesan,” nia konsidera.
Nia informa, tuir proposta ne’ebé munisípiu sira hato’o ona MAE, orsamentu boot liu mai husi munisípiu Dili, Baucau, Bobonaro, Ermera no Covalima, ne’ebé inklui ona verba kapitál dezenvolvimentu nian ba Planu Estratéjiku Dezenvolvimentu Nasionál (PEDN), Programa Nasionál Dezenvolvimentu Suku (PNDS), grande projetu no orsamentu rutinu nian,
Hodi dehan proposta ne’ebé MAE propoin ba munisípiu 12 iha tinan 2020 hamutuk millaun $208, ne’ebé ba munisípiu Dili millaun $20. “Agora depende ba diskusaun orsamentu no prioridade ne’ebé Governu sentrál identifika ona”.
Nune’e nia ho esperansa enkontru iha segunda ne’e, Autoridade Munisípiu sira bele hadi’a fali proposta para bainhira to’o iha diskusaun orsamentu bele la’o ho di’ak no hetan aprovasaun husi governu sentrál, nune’e bele halo dezenvolvimentu iha kada munisípiu.
Tuir kelendáriu husi Governu, iha loron 27 no 28 juñu sei realiza semináriu “Jornadas Orsamentais” hodi haree di’ak liután kona-ba prioridade OJE 2020.
Mezmu iha ona orientasaun hodi prepara ona proposta ba kada instituisaun Estadu, maibé Ministériu Finansa rasik seidauk fahe tetu fiskál OJE 2020 tanba sei diskute no aprova iha Konsellu-Ministru loron 10 jullu, nune’e Proposta OJE finál sei diskute no aprova iha reuniaun ezekutivu loron 18 setembru.
Hafoin iha loron 15 outubru 2019, Governu bele manda Proposta OJE 2020 ba Parlamentu Nasionál hodi bele diskute no aprova iha dezembru 2019.
Antes ne’e Governu halo ona retiru durante loron rua hodi define prioridade jerál VIII Governu Konstitusionál.
Jornalista : Julia Chatarina
Editór : Rafy Belo
