DILI, 17 juñu 2019 (TATOLI) – Kompañia HEINEKEN Timor, S.A entrega saku verde hamutuk 5000 husi matéria ai-farina, ba Governu liu-hosi Sekretaria Estadu Ambiente (SEA), hodi distribui ba Super-Merkadu, Mini-Merkadu no kioske sira, hodi fahe ba konsumidór atu bele utiliza fila fali bainhira sira ba kompras.
Sekretáriu Estadu Ambiente, Demétrio do Amaral de Carvalho hateten, asaun zero plástiku nu’udar asaun ba futuru tanba ne’e governu hahú halo kampaña liu-hosi meiu oioin.
“Husi zero plástiku ita hamosu atividade sira ne’ebé bele fó efeitu ba melloramentu ita-nia ambiente iha jerasaun tuir mai. Husi saku ida ita hakarak halo kampaña ba kada kliente ne’ebé ba sosa sasán sira bele partisipa ho responsabilidade no sira kontribui, ikus mai husi sentavu ne’ebé sira kontribui hodi sosa saku ne’e ita mobiliza,” hateten Sekretáriu Estadu Demétrio do Amaral de Carvalho durante serimónia lansamentu saku verde iha edifísiu SEA, Mandarin, segunda ne’e.
Governante ne’e reforsa tan, lansamentu saku verde ne’e nu’udar kampaña ba zero plástiku ne’ebé promove hela iha Timor-Leste no hakarak kontribui ba ambiente di’ak.
“Ita kria kondisaun ba kliente ba sosa sasán iha loja, ita la fó plástiku ne’ebé polui ita-nia ambiente no husu kliente sira kontribui”, nia dehan.
Nia mós informa, sentavu ne’ebé kliente sira kontribui liu-hosi saku verde sei halibur no lori ba apoiu grupu sira ne’ebé halo esforsu atu kuda fali ai iha rai laran, nune’e kontribui ba problema kombate plástiku no mellora ambienta liu-hosi programa reflorestasaun no melloramentu ambiente iha ita-nia rai.
Diretór Jerál Ambiente, João Carlos Soares, iha esperansa katak kampaña ne’e nu’udar inísiu hodi provoka kompañia sira bele serbisu hamutuk no tulun malu hodi bele alkansa polítika zero plástiku ne’ebé governu rasik promove hela.
Iha fatin hanesan, Diretór Ezekutivu HEINEKEN Timor, S.A, Vinay Mathur felisita governu Timor-Leste liu-hosi SEA tanba konsidera polítika zero plástiku hanesan atividade importante ne’ebé bele hatudu ba mundu, hanesan atividade saida mak hala’o iha Timor-Leste liga ho ambiente.
Nia apoiu inisiativa Governu ba polítika zero plástiku tanba konsidera poluisaun lixu plástiku sai problema makas ba ambiente, nune’e presiza eduka no fó korajen ba povu hodi hahú hamenus lixu plástiku. “Ida ne’e bele muda bainhira konsumidór sira hatene kona-ba estragu ambientál ne’ebé sei mosu husi plástiku ne’ebé uza dala ida”.
Nia mós informa oras ne’e daudauk Caltec no Mercy Corp serbisu hamutuk hodi prodús saku biogradável iha Timor-Leste no halo resiklajen ba produtu plástiku hodi sai sasán ne’ebé bele uza fali.
Enkuantu, Reprezentante husi loja Leader no Lita, Pascoal Suri Mali hateten katak nu’udar kompañia ne’ebé investe iha Timor-Leste, apoiu programa VIII Governu ba zero plástiku.
“Ami husi Leader no Lita Store, bainhira SEA introdús programa zero plástiku, ami mós komesa prodús pasta hanesan HEINEKEN halo. Fulan tolu ona Super-Merkadu rua ne’e la’o ho ida ne’e. Atu hatete de’it katak parte hotu suporta zero plástiku,” dehan reprezentante ne’e.
Nia mós haktuir, difikuldade ne’ebé Super-Merkadu sira hasoru mak seidauk iha hanoin ida katak atu uza ne’e nu’udar símbolu ida “Pasta ida ai-hun ida”, hotu-hotu seidauk iha konsiénsia.
Tuir nia, saida mak Super-Merkadu hanesan Leader, Lita Store no Dili Mart halo agora hanesan saku ida ho folin 50 sentavu, la’ós atu buka lukru maibé atu fó hanoin kuandu fó ona osan hodi hetan saku ne’e tenke kuidadu no labele soe arbiru.
Entretantu, antes ne’e iha janeiru liubá, SEA asina ona kooperasaun ida ho HEINEKEN kona-ba kampaña “Saku Ida Ai-Hun Ida”, liga ho polítika zero plástiku husi VIII Governu Konstitusionál, atu estabelese no implementa esforsu hamutuk hodi hamenus poluisaun plástiku liu-hosi projetu resiklajen lixu plástiku ba produtu seluk ne’ebé di’ak.
Jornalista : Julia Chatarina
Editór : Rafy Belo
