DILI, 17 juñu (TATOLI) – Komandante Jerál Polísia Nasional Timor-Leste (PNTL), Komisáriu Polísia, Faustino da Costa, ohin, iha Kuartél Jerál PNTL, Caicoli, Dili, fó pose ba komandante polisia na’in lima (5).
Komandante sira ne’ebé simu pose, kompostu hosi Superintendente Xefe, Armando Monteiro ba Komandante Munisípiu Dili, Superintendente, Atoninho Mauluta ba Xefe Departamentu Justisa, Segundu Komandante Unidade Espesiál Polisia (UEP), Superindente, Orlando Gomes, Superintendente Xefe Octávio Bucar de Araújo ba Komandante Munisípiu Bobonaro no Superintendente Asistente, Eduardo Campos ba Komandante interinu Munisípiu Viqueque.
Serimónia pose hala’o liuhosi termu juramentu tuir despaxu hosi kompeténsia ne’ebé fó ba Komandante Jerál iha alínea I númeru 2 artigu 10 lei orgánika PNTL, aprova tuir dekretu lei númeru 9/2009 de 18 Fevereiru.
Komisáriu Faustino da Costa, husu ba komandante na’in lima atu hala’o nafatin sira nia misaun tuir artigu 147 hodi garante seguransa interna ba sidadaun hotu, prevensaun krime, respeitu direitus umanus no lei maka determina regra no regulamentu ba polisia no forsa seguransa no forsa sira seluk.
“Husu ba komandante sira atu imi hala’o responsabilidade hanesan servisu barak ne’ebé durante ne’e imi hala’o ona tuir lei ida ne’e mak orienta servisu polisia nian,” afirma Komisáriu Faustino da Costa iha nia diskursu.
Prioridade Komandu PNTL nian maka atu kontinua lori polisia hakbesik aan ba komunidade tuir Planu Estratéjiku Dezenvolvimentu Nasional (PEDN) hodi reforsa servisu Ofisial Polisia Suku (OPS) iha territóriu Timor-Leste.
Nia apela ba komandante PNTL hotu- hotu ho membru sira atu evita aan iha kualkér problema ne’ebé la fó benefísiu ba servisu PNTL nian, liu-liu atu asegura pás iha sosiedade nia leet.
“Evita envolvimentu sira ne’ebé la nesesita no kaer nafatin regulamentu dixiplinár ita nian no devér jerál sira seluk hodi la’o tuir lei hirak ne’e,” tenik Komisáriu Faustino da Costa.
Komandante Jerál PNTL ne’e o husu ba komandante hotu- hotu iha instituisaun PNTL atu koopera ho autoridade lokál, oinsá redús problema krime no dés orden públiku ne’ebé akontese iha sosiedade hodi lori povu moris hakmatek.
“Ita tenke halo ita nia populasaun sira moris hakmatek, moris seguru hodi ita bele hetan fiar aas iha sosiedade nia leet,” afirma Faustino da Costa.
Faustino husu ba Komandante Munisípiu Dili, Superintendente Xefe, Armando Monteiro, atu koordena didi’ak ho Segundu Komandante Polisia Munisípiu Dili, Superintendente Asistente Polisia, Euclides Belo, hodi haree problema no krime sira ne’ebé akontese iha Dili tenke redús.
Nia dehan, iha 30 Agostu 2019, Timor-Leste komemora Aniversáriu Konsulta Popular ba dala 20. Selebra mós 20 setembru marka aniversáriu Forsa Internasionál iha (INTERFET), tanba PNTL sei halo servisu boot ida atu asegura seguransa.
“Komandante Dili akompaña hela situasaun boot ida maka ita sei haree liu-liu seguransa ba loron konsulta populár selebra ba tinan 20 iha 30 Agostu 2019 ita organiza didi’ak buat hotu- hotu bele la’o di’ak,” subliña Komisáriu Faustino da Costa.
Komandante na’in lima ne’ebé simu pose ne’e kompromete sei hala’o sira idak-idak nia funsaun tuir lei hodi fó susesu ba servisu PNTL iha sosiedade hodi lori Estadu Timor-Leste moris iha estabilidade no dame.
Jornalista : Eugénio Pereira
Editór : Francisco Simões
