DILI, 18 juñu 2019 (TATOLI)-Universidade Nasionál Timor Lorosa’e (UNTL), Fakuldade Enjeñaria Siénsia no Teknolojia (FEST) parseria ho JICA (Ajénsia Japaun ba Kooperasaun Internasionál) dezenvolve projetu ida hanaran FEST segundu, ne’ebé tau importánsia liu ba iha área peskiza nian, hodi nune’e bele motiva dosente sira halo peskiza iha área ambientál no enerjia renovável iha Timor-Leste.
“Atividade husi projetu ne’e atu motiva dosente sira liuliu halo formasaun balun hodi eleva koñesimentu dosente sira nian atu halo peskiza no relativamente ho asuntu ida ne’e husi fakuldade no projetu FEST ne’e konkorda atu estabelese unidade ida bolu unidade kooperasaun, nia funsaun atu trata kona- ba asuntu peskiza no kooperasaun ho parte externa sira,” informa Vise-dekanu FEST, ne’ebé trata Asuntu Kooperasaun no Peskiza, Câncio Monteiro, tuir informasaun mídia UNTL ba Ajénsia TATOLI, tersa ne’e.
Profesór Câncio Monteiro haktuir, peskiza ne’ebé hala’o antes ona jere husi parseiru; kooperasaun JICA, nune’e ba períodu ida ne’e JICA apoiu fakuldade atu jere rasik rekursu no atividade hotu.
Akadémiku ne’e mós haktuir tan katak iha tinan kotuk proposta submete husi dosente sira; totál 26 no unidade kooperasaun halo estudu kona-ba konteúdu teknikamente, nia intensaun mak peskiza. Sira-nia kontribuisaun ne’e relasiona ho ezijénsia sosiedade ka lae? Ida ne’e mak hanesan xave importante ba prosesu estudu ne’ebé mak hala’o ba iha proposta sira ne’ebé hatama.
“Nune’e iha tempu ne’ebá proposta sira ne’e hetan hotu aseitasaun maibé tanba kestaun tempu, proposta balun labele konsege halo hotu iha 2017 nune’e proposta sira ne’e sei kontinua la’o to’o tinan ida ne’e”.
Vise-dekanu Câncio Martins informa mós katak iha tinan ida ne’e peskiza husi dosente sira husi departamentu lima iha FEST la’o nafatin kona-ba área enerjia renovável liuhusi kooperasaun parseria JICA, ne’ebé estabelese tiha ona grupu ida hanaran “Renewal Energy and Environmental Research Group”.
“FEST nia regra maka, bainhira dosente ida atu peskiza nia tenke submete ba unidade peskiza nian hodi halo estudu iha konteúdu tékniku, kontribuisaun ba ezijénsia sosiedade nian, no kronogama ka durasaun tempu”.
Vise-dekanu afirma, FEST nia vizaun ba períodu ida ne’e mak dosente sira tenke peskiza no rezultadu husi peskiza sira tenke públika.
“Tinan kotuk Fakuldade enjeñaria konsege lansa ona jornál primeiru iha loron 6 setembru tinan 2018 ne’ebé hanaran Timorese academic journal of science and technology. Nune’e ba tinan ida ne’e, iha commitment atu hala’o publikasaun anuál, nune’e mós planu unidade kooperasaun nian segundu versaun FEST sei hala’o iha setembru mai,” nia informa.
Tuir planu FEST nian katak iha lansamentu ne’e sei envolve Ministériu Edukasaun, JICA no universidade rasik.
Lee mós notísia: http://www.tatoli.tl/2019/05/untl-introdus-makina-moderna-minimiza-komunidade-tesi-ai/
Jornalista : Nelia Rosario
Editór : Rafy Belo
